Pimpri : चोरीचा मुद्देमाल विक्रीसाठी आलेला अल्पवयीन पोलिसांच्या ताब्यात, 7.68 लाखाचा माल जप्त

पिंपरी/पुणे : पोलीसनामा ऑनलाइन – चोरीच्या गुन्ह्याील मुद्देमाल विक्रीसाठी घेऊन आलेल्या एका अल्पवयीन मुलाला पिंपरी चिंचवड गुन्हे शाखा युनिट चारच्या पथकाने ताब्यात घेतले आहे. ताब्यात घेण्यात आलेल्या 15 वर्षीय अल्पवयीन मुलाकडून पोलिसांनी 7 लाख 68 हजार 550 रुपयांचा मुद्देमाल जप्त केला आहे. ही कारवाई नाशिक फाटा येथे करण्यात आली असून ताब्यात घेण्यात आलेल्या मुलावर घरफोडी व वाहन चोरीचे नऊ गुन्हे दाखल असल्याचे तपासात निष्पन्न झाले आहे.

याप्रकरणी अल्पवयीन मुलासह त्याचे साथादीर किरण गुरुनाथ राठोड, शेखर संभाजी जाधव, विकी कमल मांझी (सर्व रा. भोसरी), कृष्णा उर्फ बॉबी संजय तांगतोडे (रा. नाशिक) अशी आरोपींची नावे आहे. हे सर्व आरोपी रेकॉर्डवरील सराईत गुन्हेगार आहेत.

एक सराईत गुन्हेगार नाशिक फाटा येथे चोरीचा मुद्देमाल विक्रीसाठी येणार असल्याची माहिती पोलिसांना मिळाली. त्यानुसार नाशिक फाटा येथे सापळा रचून अल्पवयीन मुलाला ताब्यात घेतले. तर त्याचा साथिदार किरण राठोड पळून गेला. ताब्यात घेण्यात आलेल्या मुलाकडे केलेल्या चौकशीत त्याने राठोड, जाधव, मांझी व तांगतोडे यांच्या मदतीने घरफोडी व वाहनचोरीचे नऊ गुन्हे केल्याचे निष्पन्न झाले. यातील चार गुन्हे भोसरी तर पाच गुन्हे नगिडी पोलिस ठाण्यात दाखल आहे.

अल्पवयीन मुलाकडून चोरीचे 66 ग्रॅम सोन्याचे, 28 ग्रॅम चांदीचे दागिने, चार एलसीडी टीव्ही, तीन दुचाकी, एक लॅपटॉप, एक टॅब, मोबाईल, चार मनगटी घड्याळे, गॅस सिलिंडर व शेगडी असा एकूण 7 लाख 68 हजार 550 रुपयांचा मुद्देमाल जप्त केला आहे. आरोपी जाधव याच्यावर 23, मांझीवर 18 तर तांगतोडे याच्यावर 19 गुन्हे दाखल असून ते सध्या येरवडा कारागृहात आहेत. तसेच पळून गेलेल्या राठोडवर चार गुन्हे दाखल आहेत.

ही कारवाई युनिट चारचे वरिष्ठ पोलीस निरीक्षक प्रसाद गोकुळे, सहायक पोलीस निरीक्षक अंबरिष देशमुख, सहायक पोलीस उपनिरीक्षक धर्मराज आवटे, पोलीस कर्मचारी प्रवीण दळे, नारायण जाधव, संजय गवारे, दादाभाऊ पवार, आदिनाथ मिसाळ, तुषार शेटे, लक्ष्मण आढारी, मो.गौस नदाफ, वासुदेव मुंडे, शावरसिद्ध पांढरे, प्रशांत सैद, सुनील गुट्टे, तुषार काळे, सुरेश जायभाये, धनाजी शिंदे, आजिनाथ ओंबासे, सुखदेव गावंडे, गोविंद चव्हाण, नागेश माळी, राजेंद्र सेटे यांच्या पथकाने केली.