ताज्या बातम्याराष्ट्रीय

राजधानीतून आतापर्यंत 241000 लोकांनी केलं स्थलांतर, मनिष सिसोदिया म्हणाले – ‘दिल्लीमध्ये राहणारा प्रत्येकजण दिल्लीवाला’

manish-sisodiya

नवी दिल्ली : वृत्तसंस्था – कोरोना व्हायरस लॉकडाऊनमध्ये काम बंद झाल्यामुळे स्थलांतर होण्यास भाग पडलेल्या स्थलांतरित कामगारांना एकीकडे दिल्ली सरकार वारंवार रोखण्याचे आवाहन करत आहे, तर दुसरीकडे मायदेशी परत जाण्याची इच्छा असलेल्या लोकांना सोयीस्करपणे परत देखील पाठवत आहे

दिल्लीचे उपमुख्यमंत्री मनीष सिसोदिया मंगळवारी म्हणाले की, जर कोणी दिल्लीत असेल तर आम्ही त्याला दिल्लीचा नागरिक मानतो. तरीही बर्‍याच लोकांना त्यांच्या मूळ राज्यात परत यायचे आहे. राजधानी दिल्लीहून ७ मे ते आतापर्यंत १९६ ट्रेनमधून २४१००० लोकांना त्यांच्या घरी परत पाठवण्यात आले आहे.

सिसोदिया यांनी ट्विट करून सांगितले की, मुख्यमंत्री अरविंद केजरीवाल यांच्या वतीने दिल्लीहून १९६ विशेष कामगार गाड्यांमधून २,४१,१६९ लोकांना त्यांच्या गावी पाठवण्यात आले आहे. त्यापैकी १.२५ लाख बिहारला गेले आहेत आणि ९६ हजार उत्तर प्रदेशात गेले आहेत.

आजही १८ गाड्या जवळपास ३०,००० प्रवाशांना घेऊन बिहार आणि उत्तर प्रदेशच्या शहरांमध्ये जातील. सगळ्या प्रवाशांना दिल्ली सरकारकडूनच आरोग्य तपासणी करून बसमधून रेल्वे स्टेशनला नेले जाते. प्रवासासाठी सरकारकडून प्रत्येक प्रवाशाला पाण्याची बाटली, ड्रायफ्रूट आणि केळी इत्यादी दिले जाते.

जागतिक महामारी कोरोना विषाणूचा प्रसार रोखण्यासाठी केंद्र सरकारने २२ मार्चला एका दिवसासाठी जनता कर्फ्यू आणि देशव्यापी लॉकडाऊन लागू केल्यामुळे स्थलांतरित कामगारांसमोर रोजंदारीचे संकट उभे राहिले आहे. आर्थिक संकटामुळे त्यांच्याकडे अन्न व घरभाडेदेखील भरण्यासाठी पैसे शिल्लक नाहीत.

राजधानीतील कोरोना विषाणूच्या परिस्थितीचा आढावा घेण्यासाठी दिल्लीचे उपराज्यपाल अनिल बैजल यांनी मंगळवारी व्हिडिओ कॉन्फरन्सिंगद्वारे मुख्यमंत्री अरविंद केजरीवाल, उपमुख्यमंत्री मनीष सिसोदिया, आरोग्यमंत्री सत्येंद्र जैन, मुख्य सचिव, पोलिस आयुक्त आणि वरिष्ठ अधिकाऱ्यांसह बैठक घेतली.

दरम्यान उपराज्यपाल बैजल म्हणाले की, महामारीचा सामना करण्यासाठी वैद्यकीय पायाभूत सुविधा बळकट करण्यासाठी परिस्थिती आणि संभाव्य परिस्थिती लक्षात घेऊन आरोग्य विभागाने रुग्णालयातील बेड आणि ऑक्सिजनच्या सुविधांची उपलब्धता सुनिश्चित केली आहे. रोगाचा प्रसार रोखण्यासाठी प्रभावी आयईसी आणि पाळत ठेवण्याचे उपाय महत्वाचे आहेत.

मंगळवारी दिल्लीत गेल्या २४ तासांत कोविड-१९ मुळे आणखी १२ जणांच्या मृत्यूनंतर या महामारीने मृत्यू झालेल्यांची संख्या २८८ पर्यंत गेली आहे, तर ४१२ नवीन पॉजिटीव्ह रुग्ण आढळल्यानंतर आतापर्यंत एकूण १४,४६५ रुग्णसंख्या झाली आहे. २२ मे रोजी दिल्लीत सर्वाधिक ६६० नवीन प्रकरणे नोंदली गेली होती. तर सोमवारी या महामारीच्या ६३५ नवीन रुग्णांची नोंद झाली.