आता आधारकार्ड शिवाय मिळणार LPG सिलिंडरवर ‘सबसिडी’, जाणून घ्या प्रक्रिया
नवी दिल्ली : वृत्तसंस्था – दर महिन्याने गॅस सिलिंडर बुक केला जातो. घरगुती एलपीजी गॅसचे बुकिंग केल्यानंतर पाठवण्यात येणारी सबसिडी ची रक्कम सरकारकडून ग्राहकांच्या थेट खात्यामध्ये पाठवली जाते. सबसिडीचा लाभ घेण्यासाठी तुमच्या गॅस कनेक्शनसोबत तुमचे आधार कार्ड क्रमांक लिंक असणे अत्यंत महत्त्वाचं आहे. जर तुमच्याकडे आधार कार्ड नसेल किंवा कोणत्याही कारणामुळे आधार कार्ड आणि गॅस कनेक्शन लिंक नसेल तरी देखील आता सबसिडी मिळू शकते. यासाठी काय करावे लागणार जाणून घ्या..
सबसिडीचा फायदा कशा प्रकारे घेऊ शकता ?
गॅस सबसिडी मिळवण्यासाठी तुम्हाला तुमच्या गॅस एजन्सीमध्ये जाऊन एलपीजी डिस्ट्रिब्यूटरला बँक खाते क्रमांक द्यावा लागेल
ज्यानंतर ग्राहकांच्या खात्यामध्ये सबसिडीची रक्कम थेट जमा होईल
बँक खात्याच्या माहितीमध्ये तुम्हाला खातेधारकाचे नाव, बँक खाते क्रमांक, बँकेच्या शाखेचा आयएफएससी (IFSC Code) कोड आणि 17 अंकी एलपीजी कंझ्यूमर आयडी द्यावा लागेल.
ज्यांच्याकडे आधार कार्ड नाही त्याच ग्राहकांना ही सुविधा देण्यात आली आहे.
कसा कराल ऑनलाइन पद्धतीने गॅस कनेक्शनशी तुमचं आधार कार्ड लिंक-
सर्वप्रथम तुमचा मोबाईल क्रमांक इंडेन गॅस कनेक्शनमध्ये रजिस्टर करावा लागेल.
यानंतर आधारच्या अधिकृत वेबसाईटवर जा. याठिकाणी तुम्हाला आवश्यक डिटेल्स भरावे लागतील.
यामध्ये बेनिफिट टाईपमध्ये एलपीजी, स्कीमचं नाव, आणि वितरकाचं नाव तसेच ग्राहक क्रमांका टाका.
आधार नंबर टाकण्याआधी तुमचा मोबाईल नंबर आणि ई-मेल आयडी टाका.
सबमिट बटणवर क्लिक करा. यानंतर मोबाईल, ई-मेलवर एक ओटीपी येईल.
वन टाईम पासवर्ड टाकून सबमिट बटणावर क्लिक करा. एका हिंदी वेबसाईटने याबाबतचे वृत्त दिले आहे.
घरगुती गॅस सिलिंडर बुक करण्यासाठी ग्राहकांना आता आणखी एक सोपा पर्याय उपलब्ध होणार आहे. देशातील सर्वात मोठी तेल मार्केटिंग कंपनी इंडियन ऑईलकडून यावर्षी आपल्या एलपीजी गॅसधारकांसाठी ही नवी सुविधा उपलब्ध करून देण्यात आली आहे. त्यामुळे आता ग्राहकांना एक मिस्ड कॉल देऊन सिलेंडर बुक करता येणार आहे. इंडियन ऑईलने दिलेल्या माहितीनुसार, संपूर्ण देशभरात ही सुविधा सुरू करण्यात आली आहे. ग्राहकांना गॅस बुक करण्यासाठी 8454955555 या क्रमांकावर रजिस्टर्ड मोबाईल नंबरवरून मिस्ड कॉल द्यावा लागेल. यासाठी कोणत्याही प्रकारचे शुल्क आकारले जाणार नाही. सध्याच्या आईवीआरएस (इंटरॅक्टिव्ह व्हॉईस रिस्पॉन्स सिस्टम) कॉल प्रणालीत कॉलसाठी सामान्य दर आकारले जातात. परंतु आता नव्या सुविधेमुळे ज्येष्ठ व्यक्ती आणि आईवीआरएस प्रणालीचा वापर करण्यात अडचणी जाणवणाऱ्या लोकांची सोय होणार आहे.