रियानं ड्रग्स केसमध्ये नाव घेतल्यानंतर रकुल प्रीत सिंह पोहचली हायकोर्टात, जाणून घ्या न्यायालयानं काय दिले आदेश
मुंबई : पोलीसनामा ऑनलाइन – सुशांत सिंग राजपूत मृत्यू प्रकरणातील ड्रग्स अँगलच्या तपासणी दरम्यान रिया चक्रवर्तीने अभिनेत्री रकुल प्रीत सिंगचे देखील नाव घेतले आहे. ड्रग्स प्रकरणात मीडियामध्ये हे नाव समोर आल्यानंतर रकुल प्रीत सिंहने दिल्ली उच्च न्यायालयात धाव घेतली, ज्यावर आज सुनावणी झाली. हायकोर्टाने अभिनेत्री रकुल प्रीत सिंहच्या रिया चक्रवर्ती ड्रग प्रकरणाशी संबंधित असलेल्या कार्यक्रमांच्या प्रक्षेपणावर स्थगिती मिळण्यासाठी केलेल्या याचिकेवर केंद्राकडे जाब विचारला.
दिल्ली उच्च न्यायालयाने अभिनेत्री रकुलचे प्रतिनिधित्व म्हणून केलेली विनंती मान्य करून केंद्र, प्रसार भारती आणि पत्रकार परिषद यांना लवकरच निर्णय घेण्यास सांगितले. तसेच रिया चक्रवर्तीशी संबंधित प्रकरणातील अभिनेत्री रकुल प्रीत सिंगशी संबंधित बातम्यांमध्ये माध्यमांवर संयम ठेवला जाण्याची शक्यता वर्तविली जात आहे. रकुल प्रीतने आपल्या याचिकेत म्हटले आहे की, रिया चक्रवर्ती ड्रग प्रकरणात तिच्या नावानंतर मीडिया ट्रायल सुरू झाले. त्यामुळे तिच्याविरोधात कोणतेही माध्यम कव्हरेज नसावे, यासाठी माहिती व प्रसारण मंत्रालयाला निर्देश देण्यासाठी रकुल प्रीत यांनी उच्च न्यायालयात धाव घेतली आहे.
माहितीनुसार, काही दिवसांपूर्वी नार्कोटिक्स कंट्रोल ब्यूरोने (एनसीबी) सांगितले होते की, ड्रग्ज प्रकरणात रिया चक्रवर्तीने रकुल प्रीत सिंह, सारा अली खान आणि डिझायनर सायमन खंबाटा यांचे नाव घेतले. एनसीबीचे उपसंचालक केपीएस मल्होत्रा यांनी सांगितले की, तपास एजन्सीने अद्याप या सर्व लोकांना समन्स पाठवले नाहीत. शनिवारी एजन्सीने मुंबई व गोव्यातील अनेक ठिकाणी छापे टाकून सहा जणांना अटक केली. वांद्रे येथील रहिवासी कर्मजितसिंग आनंद उर्फ केजेला चौकशीसाठी दक्षिण मुंबईतील एनसीबी कार्यालयात आणले गेले आणि नंतर एजन्सीने त्याला अटक केली.
दरम्यान सुशांतशी संबंधित ड्रग्स प्रकरणात एनसीबीने आतापर्यंत रियासह 17 जणांना अटक केली आहे. रियाखेरीज इतर अटक करण्यात आलेल्या आरोपींमध्ये सुशांतसिंह राजपूतचा हाऊस स्टाफ मॅनेजर सॅम्युअल मिरांडा आणि दीपेश सावंत आहेत. याशिवाय रियाचा भाऊ शोविक आणि सहा ड्रग पेडर्सनाही अटक करण्यात आली आहे.
शुक्रवारी 22 सप्टेंबरपर्यंत रिया चक्रवर्ती आणि तिचा भाऊ शौविक यांना न्यायालयीन कोठडी सुनावण्यात आली आहे. मिरांडा, सावंत, जैद विलात्र आणि अब्दुल बशीर परिहार हेही सध्या न्यायालयीन कोठडीत आहेत. दरम्यान 14 जून रोजी सुशांतसिंह राजपूत वांद्रेमधील आपल्या फ्लॅटमध्ये मृत अवस्थेत आढळला होता.