लोकसभा निवडणूक : माढ्यातून शरद पवारांच्या विरोधात राजू शेट्टी रिंगणात ?

माढा लोकसभा मतदारसंघातून पवारांविरोधात राजू शेट्टींनी निवडणूक लढवावी, असा ठराव सोलापुरातील वेळापूरमध्ये झालेल्या माढा लोकसभा मतदारसंघ मेळाव्यात करण्यात आला. स्वाभिमानीचे प्रदेशाध्यक्ष रविकांत तुपकर यांच्या नेतृत्वाखाली माढा लोकसभा मतदारसंघात कार्यकर्ता मेळावा घेण्यात आला.

गेल्या वेळी सदाभाऊ खोत यांनी या मतदारसंघातून ‘स्वाभिमानी’कडून लढताना जवळपास साडेचार लाख मते मिळवली होती. या मतदारसंघात स्वाभिमानीचे चांगले नेटवर्क असल्याने माढा लोकसभा निवडणूक पक्षाकडून लढवण्याचा आग्रह कार्यकर्त्यांकडून होत आहे.

यंदा हातकणंगलेसोबत राजू शेट्टींनी माढ्यातूनही उमेदवारी करावी, असा कार्यकर्त्यांचा आग्रह या मेळाव्यात दिसून आला. एका बाजूने रविकांत तुपकर हे शरद पवार यांच्याशी जागावाटपाबाबत चर्चा करत असून स्वाभिमानीने बुलडाणा आणि वर्धा या दोन मतदारसंघासाठी आग्रह धरला आहे. अजूनही कॉंग्रेस आघाडीकडून कोणतेही सकारात्मक उत्तर येत नसताना माढ्यासाठी स्वाभिमानीने केलेला ठराव शरद पवार आणि कॉंग्रेस आघाडीची डोकेदुखी वाढवणारा ठरणार आहे.

पाकिस्तानकडून पुन्हा शस्त्रसंधीचा भंग, समझोता एक्सप्रेस रद्द