तक्रारदाराने पत्नीच्या नावाने रहिमाबाद येथे जमीन खरेदी केली आहे. या जमिनीच्या फेरफारची नोंद फेरफार रजिस्टरमध्ये करण्यासाठी तक्रारदाराने सर्व कागदपत्रे रहिमाबादच्या तलाठी दीपाली जाधव यांच्याकडे दिली. आठवडाभरानंतर तक्रारदाराने फेरफारच्या नोंदीबाबत तलाठी दीपाली जाधव यांच्याकडे विचारणा केली. त्यावेळी फेरफारची नोंद घेण्यासाठी दोन हजार रुपयांची मागणी जाधव यांनी केली.
तक्रारदाराला लाच देण्याची इच्छा नसल्याने त्यांनी लाचलुचपत प्रतिबंधक विभागाकडे तक्रार केली. तक्रारीची शहानिशा करण्यासाठी पंचांसमक्ष तक्रारदाराला तलाठी दीपाली जाधव यांच्याकडे पाठविण्यात आले. त्यावेळी तलाठी जाधव यांनी फेरफार रजिस्टरला नोंद घेण्यासाठी दीड हजार रुपयांची लाच घेण्याचे मान्य केले. लाच मागितल्याची खात्री झाल्यानंतर रहिमाबाद येथील तलाठी कार्यालयातच सापळा रचण्यात आला. त्यानंतर लाच घेताना तलाठी दीपाली जाधव यांना रंगेहात पकडण्यात आले. याप्रकरणी सिल्लोड (शहर) पोलीस ठाण्यात गुन्हा दाखल करण्याची प्रक्रिया सुरू होती.