पोलिस सूत्रांनी दिलेल्या माहितीनुसार, नांदेड ते हैद्राबाद महामार्गावरील तुप्पा पाटीजवळील शेतकरी कादरी यांच्या शेतातील बाभळीच्या झाडास १९ नोव्हेंबर रोजी सकाळी ८ वाजेदरम्यान, एक तरूणाने कापडी दोरीने गळफास घेवून आत्महत्या केली असल्याची माहिती तुप्पा येथील पोलिस पाटील शेख आजमोद्दीन यांना समजली. दरम्यान, शेख आजमोद्दीन यांनी उपरोल्लेखित घटनेची माहिती नांदेड ग्रामीण ठाण्यातील पोलीसांना दिली.
ही माहिती समजताच महिला पोउपनि. स्वाती कावळे, पोउपनि. सोनाली कदम, पो. हे. कॉ. रमाकांत कदम व पो. काॅ. तानाजी ठाकुर यांनी पोलीस निरीक्षक द्वारकादास चिखलीकर यांच्या मार्गदर्शनाखाली घटनास्थळी धाव घेतली. त्याचवेळी, पोलिसांना घटनास्थळी असलेल्या एका दगडावर चुण्याने लिहीलेला मोबाइल क्रमांक निदर्शनास आला आहे.
नांदेड ग्रामीण पोलिसांनी दगडावरील मोबाइल क्रमांकावर संपर्क साधला असता, तो मयत तरुणाच्या मुंबईस्थित भावाचा असल्याचे निष्पन्न झाले. उपरोल्लेखित पोलीस अधिकारी व पोलिस कर्मचाऱ्यांनी घटनास्थळाचा पंचनामा करून यादव सोनकांबळे यांचा मृतदेह उत्तरीय तपासणीसाठी विष्णूपुरी, नांदेड येथील शासकीय रूग्णालयात हलविला आहे.