Pune News : बसने मालवाहू टेम्पोला धडक दिल्याने एकाचा मृत्यू

पुणे : पोलीसनामा ऑनलाइन – मुंबई बंगळुरु महामार्गावरील अपघातांची मालिका सुरुच आहे. यापूर्वी या महामार्गावर दोन अपघात झाले आहेत. पहाटे चार वाजण्याच्या सुमारास किवळे-रावेत गावाजवळ भीषण अपघात झाला आहे. लातूरहून मुंबईला जाणाऱ्या प्रवासी खासगी बसने पुढे जाणाऱ्या मालवाहू टेम्पोला जोरदार धडक दिली. या अपघातात बसमधील एकूण ४९ प्रवाशांपैकी एका प्रवाशाचा जागीच मृत्यू झाला आहे. एकूण नऊ प्रवासी गंभीर जखमी झाले. अपघातात जखमी झालेल्या प्रवाशांना औंध येथील शासकीय रुग्णालय व देहुरोड एका खासगी रुग्णालयात उपचाराकरिता दाखल करण्यात आले आहे . अपघातानंतर महामार्ग पोलीस व रावेत पोलीस चौकीचे पोलीस. घटनास्थळी दाखल झाले. अपघातग्रस्त वाहन महामार्गावरून बाजुला करण्यात आली आहेत. परिणामी, महामार्गावर वाहतूक कोंडी झाली नाही. पुण्यातील हा तिसरा भीषण अपघात आहे.

दुसरा अपघात ठिकाणांपासून १०० मीटर अंतरावर पहाटे साडेचारच्या सुमारास दोन ट्रक एकमेकांना धडकून पलटी झाले आहेत. या अपघातात एक जण जखमी झाला आहे. जखमी व्यक्तीला जवळच्या खासगी रुग्णालयात उपचारासाठी दाखल करण्यात आले आहे. नवीन कात्रज बोगदा पार केल्यानंतर पुण्याच्या दिशेने जाताना तीव्र उतार असल्याने सुसाट जाणाऱ्या मालवाहतूक वाहनांना ब्रेक लागणे अशक्य होते. ब्रेक फेल झाल्याने या परिसरात वारंवार अपघात होऊन अनेकांना जीव गमवावा लागला आहे. मात्र याबाबत राष्ट्रीय महामार्ग प्रशासन हे उपाययोजना करण्याऐवजी फक्त बघ्याची भूमिका घेत असल्याचा आरोप स्थानिक नागरिकांनी केला आहे.

दरम्यान, सोमवारी पहाटे साडेपाच वाजण्याच्या सुमारास अशीच एक घटना घडली. नर्‍हे येथील सेल्फी पॉईंटजवळ ट्रकने पुढे जाणार्‍या ट्रकला दिलेल्या धडकेत दोघांचा मृत्यु झाला. त्यात दोन जण गंभीर जखमी झाले आहेत. मिळालेल्या माहितीनुसार, पहाटेच्या सुमारास मुंबई-बंगळुरू महामार्गावर नर्‍हे येथील सेल्फी पॉइंट जवळ एका मालवाहतूक करणार्‍या ट्रकला पाठीमागून एका ट्रकने धडक दिल्याने दोघांचा जागीच मृत्यू झाला आहे. तर एक जण गंभीर जखमी झाला आहे. दोन्हीही वाहने साताराकडून मुंबईच्या दिशेने जात होती. अपघातामुळे वाहतूक कोंडी होऊन वाहनांच्या रांगा दूरपर्यंत लागल्या होत्या. सिंहगड रस्ता पोलीस ठाण्याचे पोलिस उपनिरीक्षक अमोल काळे, पोलीस कर्मचारी महेंद्र राऊत, राष्ट्रीय महामार्ग पेट्रोलिंग कर्मचार्‍यांनी तातडीने घटनास्थळी धाव घेऊन क्रेनच्या साहाय्याने अपघातग्रस्त वाहने बाजूला घेऊन वाहतूक सुरळीत केली.