पणजी : वृत्तसंस्था – एक आयआयटी इंजिनिअर असलेले गोव्याचे मुख्यमंत्री मनोहर पर्रिकर कायम सोशल मीडियावर सक्रिय असायचे . अगदी शेवटपर्यंत ते सोशल मीडियावर सक्रिय होते . ट्विटरवर ते नेहमी अपडेट असायचे . पाच दिवसांपूर्वीच त्यांनी शेवटचं ट्विट केलं होतं . विशेष म्हणजे शेवटच्या ट्विटमध्येही पर्रीकरांनी भाऊसाहेब नावानं प्रसिद्ध असलेले गोव्याचे पहिले मुख्यमंत्री दयानंद बांदोडकर यांची आठवण काढत त्यांना श्रद्धांजली अर्पण केली होती.
भाऊसाहेबांच्या जयंतीनिमित्त पर्रिकरांनी ट्विट केलं होतं . आपल्या ट्विटमध्ये पर्रिकर म्हणतात की , “गोव्याचे पहिले मुख्यमंत्री दयानंद (भाऊसाहेब) बांदोडकरांना जयंतीनिमित्त श्रद्धांजली अर्पण करतो . गोव्याच्या प्रगतीचा मजबूत पाया रचण्यासाठी भाऊसाहेब यांनी अमूल्य योगदान दिलं आहे.”
Tributes to Goa's first Chief Minister Dayanand (Bhausaheb) Bandodkar on his birth anniversary. We remember his invaluable contribution in building a strong foundation for Goa's progress.
— Manohar Parrikar Memorial (@manoharparrikar) March 12, 2019
भाऊसाहेब हे 1963 मध्ये गोव्याचे पहिले मुख्यमंत्री झाले . भाऊसाहेब महाराष्ट्रवादी गोमंतक पार्टीचे नेते होते . मुख्य म्हणजे ते 1973 पर्यंत लागोपाठ तीन वेळा ते गोव्याचे मुख्यमंत्री राहिले . भाऊसाहेब यांच्या निधनानंतर त्यांची मुलगी शशिकला काकोडकर यांना मुख्यमंत्री करण्यात आलं . ज्या गोव्याच्या एकमेव महिला मुख्यमंत्री राहिल्या आहेत.
गोव्याचे मुख्यमंत्री आणि माजी संरक्षणमंत्री मनोहर पर्रिकर हे स्वादुपिंडाशी संबंधित कर्करोगाशी झुंज देत होते . पर्रिकर हे 63 वर्षांचे होते . रविवारी संध्याकाळी त्यांनी अखेरचा श्वास घेतला . त्यांच्या मागे दोन पुत्र , सुना , नातवंडे असा परिवार आहे . काही वर्षांपूर्वीच त्यांच्या पत्नीचे कर्करोगाने निधन झाले होते . पर्रिकरांच्या निधनामुळे सोमवारी राष्ट्रीय दुखवटा जाहीर करण्यात आला आहे.
पंतप्रधान नरेंद्र मोदी , काँग्रेसचे अध्यक्ष राहुल गांधी , सरचिटणीस प्रियांका गांधी , केंद्रीय मंत्री नितीन गडकरी , भाजपाध्यक्ष अमित शहा , उपाध्यक्ष विनय सहस्रबुद्धे , उत्तर प्रदेशचे राज्यपाल राम नाईक , काँग्रेसचे लोकसभेतील नेते मल्लिकार्जुन खरगे , शिवसेना नेते संजय राऊत यांच्यासह विविध पक्षांच्या नेत्यांनी त्यांच्या निधनाबद्दल दु:ख व्यक्त केले आहे.