धुळे : पोलीसनामा ऑनलाईन – राज्याचे मुख्यमंत्री उद्धव ठाकरे यांचा शिक्षणाधिकारी यांनी एकेरी उल्लेख केल्यामुळे शिवसैनिक चांगलेच संतापले आहेत. शिवसैनिकांनी शिक्षणाधिकारी कर्यालयातील कागदपत्रे फेकून देत आपला संताप व्यक्त केला. तसेच यावेळी काही शिवसैनिकांनी शिविगाळ देखील केल्याची माहिती मिळत आहे. धुळ्यातील मनमानी करणाऱ्या शिक्षण संस्थे विरोधात शिवसेनेने माध्यमिक शिक्षणाधिकारी कार्यालयात शिवसेना स्टाईलने आंदोलन केले शिक्षणाधिकारी सुभाष बोरसे यांना फाईल फेकून मारत शिवसैनिकांनी आपला राग व्यक्त केला. संतप्त कार्यकर्त्यांनी बोरसे यांच्या टेबलवरील फाईलचे गठ्ठे बोरसे यांच्या अंगावर फेकत मुख्यमंत्र्यांबद्दल अपशब्द वापरल्याबद्दल संताप व्यक्त केला.
शिक्षणाधिकारी बोरसे यांनी मुख्यमंत्री उद्धव ठाकरे यांच्या बद्दल एकेरी शब्द वापरल्याचा आरोप शिवसेनेच्या कार्यकर्त्यांनी त्यांच्यावर करत राडा घालत शिविगाळ केली. धुळे शहरातील अनेक शाळा या शासन आदेशाची पायमल्ली करत असून मनमानी पद्धतीने फी वसूल केली जात आहेत. दरम्यान, शिक्षण संस्थांच्या मनमानी विरोधात शिक्षणाधिकाऱ्यांकडे तक्रार करत त्यांना निवेदन देण्यासाठी शिवसेना पदाधिकारी आणि कार्यकर्ते गेले होते.
त्यावेळी शिवसैनिकांनी शिक्षणाधिकाऱ्यांकडे शिक्षण संस्थेच्या मनमानी कारभारावर कारवाई करण्याची मागणी केली. यावेळी शिक्षणाधिकारी यांनी मुख्यमंत्री उद्धव ठाकरे यांचा एकेरी उल्लेख केल्याने शिवसैनिक चांगलेच तापले. शिक्षण विभाग कोणतीही कारवाई करत नसल्याच्या आरोप यावेळी शिवसैनिकांनी केला. यावेळी शिक्षणाधिकारी बोरसे हे उडवाउडवीची उत्तरं देत असून फी वसुली करणाऱ्या शाळांविरोधात कारवाई करीत नसल्याचा आरोपही यावेळी शिवसैनिकांनी केला.