मेरठ : वृत्तसंस्था – उत्तर प्रदेश मेरठमधील फलावदा पोलीस ठाण्याच्या हद्दीत १९ जानेवारीला मदनची हत्या झाली होती. कुटुंबीयांनी हत्या झाल्याची तक्रार पोलीस ठाण्यात केली होती. या घडलेल्या मदन हत्याकांडाचा उलगडा पोलिसांनी केला आहे. मुलानेच साडूच्या मदतीने जन्मदात्या पित्याचा खून केल्याची धक्कादायक माहिती समोर आली आहे. या प्रकरणी पोलिसांनी दोघांना अटक केली आहे.
अधिक माहितीनुसार, पोलिसांनी या घटनेचा तपास केला. कुटुंबीयांची चौकशी केली. मदन फोनचा वापर करत नव्हता. मदनचा मुलगा मिंटू याचे हत्येच्या घटनेच्या दिवसाचे कॉल डिटेल्स पोलिसांनी मिळवले. त्या दिवशी मिंटू आणि त्याचा साडू सोनू यांच्यात फोनवरून बऱ्याचदा बोलणे झाले होते. त्यामुळे पोलिसांना संशय आला. त्यांना ताब्यात घेऊन त्याची चौकशी करण्यात आली.
पोलीस चौकशीत मिंटूने पोलिसांना घटनेची माहिती दिली. त्याचे वडील मदन त्याच्या पत्नीला नेहमी अशुभ म्हणायचे. कुटुंब कर्जबाजारी झाले होते. त्याचा दोष ते पत्नीला द्यायचे. यावरून मिंटू आणि त्याच्या पत्नीमध्ये दररोज भांडण व्हायचे. रोजच्या भांडणाला वैतागून मिंटूने साडूच्या मदतीने जन्मदात्या पित्याचा खून केला. मिंटू आणि त्याच्या साडूने मदनला एका तलावाजवळ नेले. तेथे आधी दारू पाजली. त्यानंतर गळा आवळून त्याची हत्या केली. ओळख पटू नये यासाठी त्याने मदनचा चेहरा विद्रुप केला. त्यानंतर विट तलावात फेकली, अशी माहिती आरोपींनी पोलिसांना दिली.