PF खात्यावर मोफत 6 लाखांचा फायदा, जाणून घ्या काय आहे EPFO चा ‘हा’ नियम ?
नवी दिल्ली : वृत्तसंस्था – भविष्य निर्वाह निधीबाबत प्रत्येक नोकरदार माणूस उत्साही असतो. प्रत्येक महिन्याला पगारातून कापून जाणारी रक्कम अगोदर खटकते, परंतु नंतर सतत बॅलन्स चेक केल्यावर दिसणारी रक्कम पाहिल्यावर बरे वाटू लागते.
कर्मचारी भविष्य निर्वाह निधी संघटनेच्या खातेधारकांना कर्मचारी भविष्य निर्वाह निधी आणि कर्मचारी पेन्शन स्कीमशिवाय जीवन विम्याचा आणखी एक मोठा फायदा मिळतो आणि ती योजना आहे सब्सक्रायबर इम्प्लॉईज डिपॉझिट लिंक्ड इन्श्युरन्स स्कीम.
ईपीएफओ अंतर्गत संघटीत क्षेत्रातील खातेदारांना या योजनेंतर्गत सहा लाख रुपयांचे अतिरिक्त जीवन विमा संरक्षण मिळते. हे तुम्ही तुमच्या पीएफ अकाउंटसोबत लिंक करू शकता. या स्कीमची खासियत म्हणजे कोणीही कर्मचारी आपल्या नोकरीच्या कालावधीत यासाठी कोणतीही रक्कम देत नाही.
या स्कीम अंतर्गत नॉमिनी, खातेधारकाचे आजारपण, अपघात किंवा आकस्मित मृत्युनंतर विमा रक्कमेसाठी क्लेम करू शकतो. यामध्ये एक रक्कमी पैसे मिळतात आणि ही स्कीम खातेधारकासाठी एकदम मोफत असते.
ईडीएलआयएस अंतर्गत मिळते विमा संरक्षण
ईपीएफओच्या कर्मचार्यांना ही सुविधा इम्प्लॉईज डिपॉजिट लिंक्ड इन्श्युरन्स स्कीम अंतर्गत मिळते. स्कीम अंतर्गत खातेधारकाचा अचानक किंवा नैसर्गिक मृत्यू झाल्यास नॉमिनीला सहा लाख रूपये दिले जातात. पूर्वी या रक्कमेची मर्यादा 3,60,000 रुपये होती. परंतु, सप्टेंबर 2015 मध्ये ईपीएफओने ती वाढवून सहा लाख केली आहे.
कशी ठरवली जाते विमा संरक्षण रक्कम?
कोणत्याही खातेधारकाचा मृत्यू झाल्यास नॉमिनीला मागील 12 महिन्याच्या सरासरी सॅलरीच्या 20 पट आणि सोबत 20 टक्के बोनस मिळतो. याचा अर्थ असा की, जर तुमची सध्याची बेसिक सॅलरी 15,000 रुपये आहे तर नॉमिनीला मिळणारी रक्कम कमाल 3,60,000 होते.
ईडीएलआयएसमध्ये कंपनी देते योगदान
संघटीत क्षेत्रात काम करणार्या कर्मचार्यांच्या वेतनातून प्रत्येक महिन्याला ईपीएफची रक्कम कापली जाते आणि तेवढीच रक्कम कंपनीसुद्धा जमा करते. सध्याच्या स्थितीत ईपीएफमध्ये कर्मचारी आपल्या बेसिक सॅलरीच्या 12 टक्के रक्कम जमा करतो आणि कंपनीकडून सुद्धा 12 टक्के रक्कम जमा केली जाते. कंपनी 3.67 टक्के रक्कम ईपीएफमध्ये आणि 8.33 टक्के रक्कम ईपीएसमध्ये जमा करते.
परंतु, याशिवाय सुद्धा कंपनीकडून काही योगदान दिले जाते. ईडीएलआई स्कीम अंतर्गत कंपनीला 0.50 टक्के, 1.1 टक्के ईपीएफ अॅडमिनिस्ट्रिेटिव्ह चार्ज आणि 0.01 टक्के ईडीएलआयएस अॅडमिनिस्ट्रेटिव्ह चार्ज द्यावा लागतो.
अशाप्रकारे कंपनीकडून ईडीएलआयमध्ये जमा केल्या जाणार्या 0.5 टक्के कॉन्ट्रीब्यूशन अंतर्गत पीपीएफ खातेधारकाच्या नॉमिनीला सहा लाख रुपयांपर्यंत इन्श्युरन्स संरक्षण मिळते. कर्मचारी भविष्य निवार्ह निधीमध्ये सहभागी सर्व कर्मचारी ईडीएलआय 1976 च्या अंतर्गत संरक्षित केले जातात.
कसा करावा विमा रक्कमेसाठी दावा?
जर ईपीएफ खातेधारकाचा अचानक मृत्यू झाला तर त्याचा नॉमिनी किंवा कायदेशिर वारसदार इन्श्युरन्स संरक्षणासाठी क्लेम करू शकतो. क्लेम करणारा जर अल्पवयीन किंवा वृद्ध असेल तर त्याच्यावतीने गार्डीयन क्लेम करू शकतो. यासाठी इन्श्युरन्स कंपनीला डेथ सर्टिफिकेट, सक्सेशन सर्टिफिकेट आणि बँक डिटेल्स द्यावे लागतात.
जर पीएफ खात्याचा कुणी नॉमिनी नसेल तर कायदेशिर वारसदार या रक्कमेसाठी क्लेम करू शकतो. पीएफ खात्यातून पैसे काढण्यासाठी कंपनीकडे जमा होणार्या फॉर्मसोबत इन्श्युरन्स कव्हरचा फॉर्मसुद्धा जमा करावा. प्रथम या फॉर्मची कंपनी पडताळणी करेल आणि त्यानंतर कवरचे पैसे मिळतील.
निवृत्तीनंतर मिळत नाही क्लेम
पीएफ अकाऊंटवर असलेल्या या इन्श्युरन्ससाठी क्लेम केवळ तेव्हाच करता येतो, जेव्हा पीएफ खातेधारकाचा मृत्यू निवृत्तीच्या अगोदर होतो, म्हणजे नोकरी करत असताना होतो. मृत्यूच्या वेळी कर्मचारी ऑफिसमध्ये होता, घरात होता की सुट्टीवर होता, याचा क्लेमवर काहीही परिणाम होत नाही. मृत्युनंतर नॉमिनी विमा रक्कमेसाठी क्लेम करू शकतो.