‘या’ निर्णयामुळे व्हॉट्सअ‍ॅपची सुरक्षा धोक्यात

नवी दिल्ली : वृत्तसंस्था – व्हॉटसअ‍ॅप, मेसेंजर आणि इन्स्टाग्राम या तीनही मुख्य सेवा एकत्रित करण्याचा निर्णय फेसबुकने घेतला आहे. त्यामुळे व्हॉटसअ‍ॅपच्या सुरक्षेवरच प्रश्नचिन्ह निर्माण झाले आहे. या निर्णयामुळे मजकुराचे एंड-टू-एंड इन्क्रिप्शन (कोडींग) सुरक्षित राखणे फेसबुकसाठी एक आव्हान असणार आहे. याबाबत ‘द वायर्ड’ या अमेरिकी मासिकाने वृत्त प्रसिद्ध केले आहे. व्हॉट्सअ‍ॅप चॅट एंड-टू-एंड इन्क्रिप्ट केलेले असते. तर, फेसबुक मेसेंजरमध्ये देखील गुप्त संवाद (सीक्रेट कन्व्हरसेशन) नावाचे फीचर असते. हे फीचर युजर टर्न ऑन करू शकतो. परंतु, इन्स्टाग्राममध्ये चॅट संरक्षित करण्यासाठी एंड-टू-एंड इन्क्रिप्शनसारखी कोणतीही सुविधा उपलब्ध नाही. हा प्रकार आव्हानात्मक असल्याचे जॉन हाफकिन्सचे क्रिप्टोग्राफर मॅथ्यू ग्रीन यांनी म्हटले आहे.

फक्त व्हॉट्सअ‍ॅपमध्ये एंड-टू-एंड इन्क्रिप्शन अगोदरपासूनच आहे. अशात इन्क्रिप्शनची गरज नसलेल्या क्रॉस अ‍ॅप ट्रॅफिकला अनुमती देणे हा जर फेसबुकचा उद्देश असेल, तर विचार करा, काय होऊ शकते, असे वक्तव्य ग्रीन यांनी केले आहे.

फेसबुकने नुकताच मेसेंजर, व्हॉट्सअ‍ॅप आणि इन्स्टाग्राम या तीन सेवा एकत्रिकरण करण्याचा निर्णय घेतला आहे. सेवांच्या एकत्रिकरणामुळे नेमके काय होते हे पाहणे महत्त्वाचे आहे. उदाहरणार्थ, समजा तुमच्याकडे व्हॉट्सअ‍ॅप इन्स्टॉल केलेला आहे, आणि तु्मच्याकडे इन्स्टाग्राम किवा मग मेसेंजर मात्र इन्स्टॉल केलेले नाही. अशा वेळी या तीन सेवांचे एकत्रिकरण नसेल तर तुम्ही व्हॉट्स्अ‍ॅपद्वारे मेसेंजर किंवा इन्स्टाग्रामवर चॅट करू शकणार नाही. मात्र, कंपनीने या तीन सेवांचे एकत्रिकरण केलेले असल्यास तुम्ही व्हॉट्सअ‍ॅपद्वारे मेसेंजर किंवा इन्स्टाग्रामवर चॅट करू शकता.
गेल्या वर्षी व्हॉट्सअ‍ॅपचे सहसंस्थापक जेन कूम यांनी डेटा प्रायव्हसी (गोपनीयता) आणि इन्क्रिप्शनबाबत मार्क झुकरबर्ग यांच्याशी झालेल्या मतभेदांनंतर कंपनी सोडली होती. कूम हे व्हॉट्सअ‍ॅप यूजर्सच्या प्रायव्हसीबाबत आग्रही होते.
Loading...
You might also like