दिल्ली : वृत्तसंस्था – एका ५० वर्षीय महिलेला पुरुषांसमोर नग्न करुन गुप्तांगात मिर्चीची पुड आणि मिठ टाकून छळ केल्याची हृदयद्रावक घटना राजधानी दिल्ली येथे घडली आहे. पीडित महिला ही निवारा गृहात राहत आहे. एवढेच नाही तर या महिलेवर उकळत पाणी टाकून तिला मारहाण करण्यात येत असल्याची बाब समोर आली आहे. याप्रकरणानंतर महिला आयोगाने या घटनेची गांभीर्याने दखल घेतली असून या महिलाश्रमाचा परवाना रद्द करण्यात येणार आहे.
देवरिया वसतीगृहातील वेश्या व्यवसाय उघडकीस आल्यानंतर देशभरातील महिलाश्रय आणि महिला वसतीगृहांवर प्रश्चचिन्हं उपस्थित झाला आहे. अशातच दिल्लीजवळील एका महिलाश्रमात एका महिलेचा प्रचंड शारीरिक आणि मानसिक छळ होत असल्याची तक्रार दिल्लीच्या महिला आयोगाकडे करण्यात आली होती. त्यानुसार आयोगाच्या टीमने महिलाश्रमाला भेट दिली आणि पीडित महिलेची सुटका केली. या महिलाश्रमात सर्वच महिलांकडून भरपूर काम करून घेतले जात होते. एखाद्या महिलेने काम केले नाही तर तिला मारहाण केली जायची.
पीडित महिलेनी दिलेल्या माहितीनुसार तिचा आश्रमातील पाच जण तिचा छळ करत होते. आश्रमाचे तीन पदाधिकारी आणि आश्रमाचे मालक दाम्पत्य या महिलेचा प्रचंड छळ करत होते. एकदिवशी आश्रमातील पुरुष कर्मचाऱ्यांसमोर तिचे कपडे फाडण्यात आले. तिला पूर्णपणे नग्न केल्यानंतर तिच्या गुप्तांगात मिर्चीची पूड आणि मीठ टाकण्यात आले. त्यानंतर तिला जबर मारहाणही करण्यात आली. संबंधित महिलाश्रमाची तपासणी केल्यानंतर महिला आयोगाच्या टीमने महिलेला तात्काळ एका सरकारी महिलाश्रमात हलवले आहे. आरोपींची चौकशीही करण्यात आली आहे. याआधी देखील या महिलाश्रमात अशा घटना घडल्या आहेत. अनेक महिलांनी या आश्रमात होणाऱ्या छळाबद्दल तक्रार दाखल केली आहे.