पार्थ, तुम्ही जन्मत: फायटर’ ! पद्मसिंह पाटील यांच्या नातवाची पोस्ट

पोलिसनामा ऑनलाईन टीम – अभिनेता सुशांतसिंह राजपूतच्या आत्महत्येबाबत पार्थ पवार यांचे वक्तव्य इमॅच्युर असून त्यांच्या बोलण्याला कवडीची किंमत आम्ही देत नाही , अशा शब्दात राष्ट्रवादी काँग्रेसचे अध्यक्ष शरद पवार यांनी फटकारले होते. त्यानंतर आता पार्थ पवार यांना आजोळातून समर्थन मिळाले आहे. पार्थ तुम्ही जन्मत: फायटर आहात, अशी पोस्ट नुकतेच भाजपवासी झालेले पद्मसिंह पाटील यांचे नातू मल्हार पाटील यांनी फेसबुकवर केली आहे.

पार्थ पवार यांच्या आई सुनेत्रा पवार या पद्मसिंह पाटील यांच्या बहिण आहेत. अजित पवार आणि डॉ. पद्मसिंह पाटील मेव्हणे आहेत. मल्हार पाटील हे तुळजापूरचे भाजप आमदार राणा जगजित सिंह यांचे चिरंजीव आहेत. उस्मानाबाद जिल्ह्यातील तेर हे पार्थ पवार यांचे आजोळ आहे. सुशांत सिंह राजपूत मृत्यू प्रकरणात सीबीआय चौकशीची मागणी करणार्‍या पार्थ पवार यांना शरद पवारांनी फटकारले होते.

त्यावर भाष्य करणार नाही, असे पार्थ पवार यांनी म्हटले होते. तर अजित पवार यांनीही कोणतीही प्रतिक्रिया दिलेली नाही. मात्र त्याचवेळी आजोळातून मात्र पार्थ पवार यांना समर्थन मिळाले आहे. मल्हार पाटील यांनी फेसबुकवर लिहिले आहे की, पार्थ तुम्ही जन्मत: फायटर आहात आणि मी ते लहानपणापासून पाहिले आहे. मला तुमचा अभिमान आहे. आपण उस्मानाबादचे आहोत आणि लढायचे कसे हे आपल्याला माहित आहे.