विशाखापट्टणम : वृत्तसंस्था – आंध्र प्रदेशचे माजी मुख्यमंत्री वायएसआर रेड्डी यांचे पुत्र आणि वायएसआर काँग्रेसचे अध्यक्ष जगमोहन रेड्डी यांच्यावर विशाखापट्टण विमानतळावर जीवघेणा हल्ला करण्यात आला आहे. एका अज्ञाताने रेड्डी यांच्यावर धारदार शस्त्राने वार केले आहेत. यात रेड्डी यांच्या हाताला दुखापत झाली असून त्यांना तातडीने रुग्णालयात दाखल करण्यात आले आहे. रेड्डी यांच्या बंदोबस्तासाठी तैनात असलेल्या पोलिसांनी आरोपीला ताब्यात घेतले आहे.
हल्लेखोर तरुण कोण आहे याची माहिती अद्याप कळू शकलेली नाही. रेड्डी विमानतळाच्या लाउंजमधून बाहेर निघाले. त्यावेळी सेल्फीच्या बहाण्यानं हा तरुण रेड्डी यांच्या जवळ गेला आणि काही कळण्याच्या आत त्यानं रेड्डी यांच्यावर हल्ला केला, अशी माहिती विमानतळावरील अधिकाऱ्यांनी दिली. हल्ल्यात रेड्डी यांच्या हाताला किरकोळ दुखापत झाली आहे. त्यांच्यावर उपचार सुरू आहेत. हा हल्ला नेमका कोणी केला आणि का केला, हे अद्याप कळू शकलेलं नाही. पोलिसांनी आरोपीची चौकशी सुरू केली आहे.
जगनमोहन रेड्डी हे आंध्र प्रदेशचे माजी मुख्यमंत्री वायएसआर रेड्डी यांचे पुत्र आहेत. वायएसआर यांच्या अपघाती मृत्यूनंतर काँग्रेसनं जगनमोहन यांना पक्षात फारसं महत्त्व न दिल्यानं त्यांनी वायएसआर काँग्रेसची स्थापना केली होती. आंध्रमध्ये त्यांचा पक्ष दुसऱ्या क्रमांकाचा मोठा पक्ष असून रेड्डी हे सध्या विधानसभेचे विरोधी पक्षनेते आहेत.