ताज्या बातम्यामहत्वाच्या बातम्यामुंबई

अभिमानास्पद ! ‘जगात जर्मनी, भारतात परभणी’, ‘कोविशिल्ड’ आणि ‘कोवॅक्सिन’ लसीच्या परवानगीची घोषणा करणारा ‘आपला माणूस’ व्ही.जी. सोमाणी

dcgi somani dcgi somani

मुंबई : पोलीसनामा ऑनलाईन -जगात जर्मनी, भारतात परभणी.. ही म्हण तुम्ही ऐकली किंवा वाचली असेलच. या म्हणीचा प्रत्यय रविवारी (दि. 3) देशवाशीयांना आला. मराठवाड्याच्या दुष्काळग्रस्त परभणी जिल्ह्यातील भूमीपुत्राने देशात कोरोनाच्या दोन लसींना परवानगी दिल्याची घोषणा केली. ड्रग कंट्रोलर जनरल ऑफ इंडियाने ( DCGI) कोरोना प्रतिबंधात्मक 2 लसींना परवानगी दिली आहे.डीसीजीआयचे संचालक व्हीजी सोमाणी (DCGI Director VG Somani) यांनी पत्रकार परिषदेत सीरमच्या कोविशिल्ड आणि भारत बायोटेकच्या कोवॅक्सिन लसीला आपातकालीन वापरासाठी परवानगी दिल्याचे जाहीर केले. देशवासियांसाठी आणि महाराष्ट्रासाठी हा अभिमानाचा क्षण आहे. गेल्या वर्षभरापासून चिंताग्रस्त असलेल्या देशवासीयांच्या जीव या घोषणेने भांड्यात पडला आहे.

 

 

 

 

 

 

 

वेणूगोपाळ सोमानी हे मूळचे मराठवाड्यातील दुष्काळी भागातील परभणीचे असून सध्या ते DCGI चे संचालक बनून दिल्लीत कार्यरत आहेत. वेणूगोपाळ याचे प्राथमिक आणि माध्यमिक शिक्षणही परभणी जिल्ह्यातच झाले आहे. पुढे त्यांनी उच्च शिक्षण M. Pharm आणि Ph. D नागपूर विद्यापीठातून पूर्ण केली आहे. काही कालावधीनंतर Central Drugs Standard Control Organisation सोबत काम करण्यास सुरुवात केली. सुरुवातीला ड्रग्स इन्स्पेक्टर म्हणून सुरू झालेला त्यांचा प्रेरणादायी प्रवास 2019 पर्यंत DCGI (Drugs Controller General of India) पदापर्यंतत पोहोचला. डॉ. व्ही. जे सोमानी यांनी मुंबई, अहमदाबाद, कोलकाता, दिल्ली अशा ठिकाणी वेगवेगळ्या पदांवर यशस्वी कामगिरी केली आहे. डॉ. सोमानी सध्या धोरण तयार करणं, प्रशिक्षण, निवड प्रक्रिया, नियामक प्रक्रियेसाठी राष्ट्रीय आणि आंतरराष्ट्रीय स्तरावर काम करत आहेत.

शनिवारीच कोविशिल्ड आणि कोवॅक्सिन या लसींना सेंट्रल ड्रग्स स्टँडर्ड कंट्रोल ऑर्गनायझेशन (CDSCO)च्या कोरोनावरच्या तज्ज्ञ समितीने मान्यता दिली होती. त्यानंतर आता डीसीजीआयकडून परवानगी मिळाली आहे. सोबतच कॅडीलाच्या लसीला तिसऱ्या टप्प्यातल्या क्लिनिकल ट्रायल करायलाही परवानगी देण्यात आली आहे. सीरम आणि भारत बायोटेकच्या या दोन्ही लसी 2 ते 8 डिग्री सेल्सिअस तापमानात ठेवण्यात येऊ शकतात, असे डीसीजीआयने म्हटले आहे. तसेच, थोडा ताप, वेदना आणि अलर्जी असे परिणाम प्रत्येक लसींमध्ये असतात. या दोन्ही लसी 110 टक्के सुरक्षित आहेत, असे व्ही. जी सोमाणी यांनी म्हटले आहे.