Pune : स्टोन क्रशर व खाणीची चौकशी करून अहवाल सादर करा; भोर मधील प्रकार, NGT चे आदेश
File Photo पुणे : पोलीसनामा ऑनलाइन – भोर तालुक्यातील पारवाडी येथे सुरू असलेल्या स्टोन क्रशर व खाणीमुळे पर्यावरणाचे नुकसान होत आहे, असे निदर्शनात आले तर संबंधित यंत्रणेने कारवाई करावी व या बाबतचा अहवाल तीन महिन्यांत सादर करावा, असे आदेश राष्ट्रीय हरित लवादाने (एनजीटी) दिले आहेत.
पारवाडी ग्रामपंचायतीमध्ये सुरू असलेल्या स्टोन क्रशर व खाणकामाबाबत गावचे सरंपच पुष्पा लिमण, उपसरपंच शरद भगत व सदस्यांनी ओम साई क्रशर आणि इतरांविरोधात ॲड. राजेश कातोरे आणि ॲड. तेजस कांबळे यांच्यामार्फत एनजीटीत दावा दाखल केला होता. राज्य पर्यावरण प्रभाव मूल्यांकन प्राधिकरण (एसईआयए), राज्य प्रदूषण नियंत्रण मंडळ (एसपीसीबी) आणि जिल्हा न्यायदंडाधिकारी यांना हे आदेश देण्यात आले आहेत. गावांमध्ये सुरू असलेले स्टोन क्रशर मशिन हे बेकायदेशीर असून त्यामुळे पर्यावरण व पिकांचे नुकसान होत आहे. तसेच पाण्याची पातळी कमी होत असून हाद-यांमुळे घरांना तडे जात आहे. त्यामुळे स्टोन क्रशर व खाण बंद करून त्यांच्याकडून नुकसान भरपाई वसूल करावी, असे दाव्यात नमूद करण्यात आले होते. त्यामुळे याबाबत एसईआयए, एसपीसीबीजिल्हा आणि जिल्हा न्यायदंडाधिकारी यांची कमिटी स्थापन करून स्टोन क्रशर व खाणीमुळे पर्यावरणाचे नुकसान होत आहे का? तसेच असेल तर कारवाई करून त्याबाबत काही दंड आकारला जाऊ शकतो? का याबाबत पाहणी करण्याचे आदेश दिले आहेत. आदेश दिल्यापासून तीन महिन्यांत याचा अहवाल एनजीटीत सादर करावा. तसेच तक्रारदार यांनी याबाबतची कागदपत्रे दोन आठवड्यात समितीकडे सादर करावी, असे निकालात नमूद आहे. लवकरच समितीकडे कागदपत्रे दिली जाणार आहेत, असे लिमण व ॲड. कोतोरे यांनी सांगितले.