वृत्तसंस्था – पसंतीची चॅनल निवडण्याचा अधिकार ग्राहकांना देणाऱ्या धोरणाची उद्यापासून म्हणजेच १ फेब्रुवारी पासून अंमलबजावणी करण्यात येणार आहे. मात्र, ज्या ग्राहकांनी यापूर्वीच दीर्घकालीन प्लॅन घेतले आहेत व त्यांना ते चालू ठेवायचे असल्यास त्यांची सेवा खंडित करू नये, असे निर्देश देखील ट्रायने केबलचालक व डीटीएच ऑपरेटर्सना दिले आहेत अशी माहिती ट्रायच्या अध्यक्षांनी दिली आहे.
ही सूचना सर्व डीटीएच ऑपरेटरपर्यंत पोहोचवण्यात आल्याचे त्यांनी सांगितले. सहामाही वा वार्षिक योजनांमध्ये आर्थिक सवलत मिळत असल्याने अनेक ग्राहक त्यात सहभागी होतात. ट्रायची नवी नियमावली १ फेब्रवारीपासून लागू होत असली तरी या ग्राहकांच्या प्लॅनची मुदत चालू वर्षाच्या मध्यात अथवा त्यानंतर संपत आहे. अशा ग्राहकांना दिलासा देण्यासाठी हा निर्णय घेण्यात आल्याचे शर्मा यांनी सांगितले. पूर्वनियोजित कार्यक्रमानुसार नवे धोरण एक फेब्रुवारीला अंमलात येईल, असे ते म्हणाले. नव्या धोरणामुळे ग्राहकांना केवळ हवी ती चॅनल पहाता येतील व त्यात त्यांचा आर्थिक लाभ देखील होईल, असा दावा त्यांनी केला आहे.