रेग्युलेटरी फाइलिंगच्या माध्यमातून मिळालेल्या माहितीनुसार, IL&FS कडे ९१ हजार कोटीचे कर्ज आहे. भविष्य निर्वाह व निवृत्ती वेतन फंड्समधील एकूण रक्कम ही IL&FS ला बँक, म्यूचुअल फंड आदी योजनांकडून प्राप्त निधीपेक्षा भिन्न आहे. यामुळे भविष्य निर्वाह व निवृत्ती वेतन फंड्सच्या माध्यमातून गुंतवणूक झालेल्या २० हजार कोटीवर प्रश्नचिन्ह निर्माण झाले आहे. IL&FS कडे असणाऱ्या ९१ हजार कोटींच्या कर्जापैकी, ६१ टक्के रक्कम बँकेची आहे तर उर्वरित रक्कम कर्जरोखे आणि कमर्शिअल दस्तावेजावरील कर्जातून मिळालेली आहे.
AAA मुळे झाली गुंतवणूक
IL&FS सारख्या कंपन्यांमध्ये गुंतवणूक केल्यास चांगला परतावा मिळतो शिवाय IL&FS या कंपनीला AAA अर्थात गुंतवणुकीस सुरक्षित असल्याचे प्रमाणपत्र प्राप्त आहे. याच गोष्टींचा विचार करून भविष्य निर्वाह व निवृत्ती वेतन निधीचे व्यवस्थापन करणाऱ्या काही फंड्सने IL&FS चे काही बॉंडस खरेदी केले. परंतु समोर आलेल्या माहितीनुसार, ही कंपनी दिवाळखोरीच्या उंबरठ्यावर आहे असे समजत आहे. अशी परिस्थिती निर्माण झाल्याने या बॉड्सच्या माध्यमातून गुंतवलेली २० हजार कोटीची रक्कम बुडण्याची परिस्थिती निर्माण झाली आहे.
या कंपनीत गुंतवणूक करणाऱ्या काही बँकाही बुडण्याची शक्यता आहे. IL&FS मध्ये सर्वात जास्त रक्कम येस बँक, पंजाब नॅशनल बँक, इंडसइंड बँक आणि बँक ऑफ बडोदा यांची अडकली आहे. मात्र यात बँकांमध्ये कोणत्या भविष्य निर्वाह व निवृत्ती वेतन फंड्सची रक्कम अडकलेली आहे याची माहिती अद्याप समोर आलेली नाही. परंतु या ग्रुपचे ४० टक्के बॉंड्स हे भविष्य निर्वाह व निवृत्ती वेतन फंड्स कडे असण्याची शक्यता एका बँकर तज्ञाने वर्तवली आहे. दरम्यान, याबाबत IL&FS कडून कुठलीही माहिती मिळू शकली नाही.