लाच लुचपत प्रतिबंधक विभागाच्या आहवालातील यावर्षीच्या आकडेवारीनुसार राज्यातील आठ परिक्षेत्रात भ्रष्टाचारामध्ये अव्वल क्रमांक पुणे (१८२ सापळे) परिक्षेत्राचा लागत आहे. गेल्यावर्षीपेक्षा यात ४ टक्के वाढ आहे. त्या पाठोपाठ मुख्यमंत्र्यांच्या नागपूर (११९ सापळे) परिक्षेत्राचा नंबर लागतो. या विभागात गतवर्षीच्या तुलनेत १९ टक्क्यांनी वाढ झाली. राज्यात जानेवारी २०१८ ते डिसेंबर २०१८ पर्यंत आठ परिक्षेत्रात ८३० सापळे, अपसंपदेचे २२ अन्य भ्रष्टाचाराचे २३ असे गुन्हे दाखल झाले असून यात पुणे परिक्षेत्रात १८२ सापळे, नागपूर परिक्षेत्रात ११९ सापळे, नाशिक परिक्षेत्रात १०४, औरंगाबाद परिक्षेत्रात १०९, अमरावती परिक्षेत्रात ९६, ठाणे परिक्षेत्रात ९७, नांदेड परिक्षेत्रात ८४ सापळे यशस्वी करुन गुन्हे दाखल करण्यात आले आहेत. नांदेड परिक्षेत्रात नांदेड, परभणी, लातूर, हिंगोलीचा समावेश असून नांदेड जिल्ह्यात २५ सापळे, परभणी १७, लातूर व हिंगोली २१ सापळे यशस्वी झाले आहेत. यात ८४ गुन्हे दाखल झाले आहेत.
लाचलुचपत विभागाकडून राज्यात एकूण ८३० सापळ्यात १ कोटी ६७ लाख ९२ हजार ५७८ रुपये जप्त करण्यात आले आहेत. राज्यात एकूण ८३० सापळ्यांपैकी महसूल विभागात २०२ सापळे यशस्वी करीत ३५ लाख २० हजार ४०० रुपये सापळ्यातील रकमा जप्त केल्या आहेत. तर पोलिस दलात १७९ सापळ्यात २३ लाख ३८ हजार ५०० रुपये जप्त करण्यात आले आहेत.