पुणे : पोलीसनामा ऑनलाइन – मला वृद्धाश्रमात ठेवा, हाती घेतलेल प्रकल्प पूर्ण करून दोन वर्षांमध्ये ठेवीदारांचे पैसे परत करेन, त्यातून काही रक्कम शिल्लक राहू शकते, अशी विनंती डी. एस. कुलकर्णी यांनी न्यायालयात सुनावणी दरम्यान केली.
गुंतवणूकदारांचे पैसे परत न करून फसवणूक केल्याप्रकरणी विशेष न्यायाधीश दिलीप मुरूमकर यांच्या न्यायालयात डीएसकेंविरोधातील खटल्याची सुनावणी सुरू आहे. एके काळी पुण्यात राज्य केलेले आणि मराठी युवकांना व्यवसायासाठी पुढे आणण्यासाठी मार्गदर्शन करणारे डीएसके गेल्या वर्षभरापासून येरवडा कारागृहात आहेत. डीएसके यांच्या मालमत्ता जप्त करण्यात आल्या असून, त्यातील विक्री योग्य असलेल्या मालमत्तांची यादी न्यायालयात दिली आहे. या प्रकरणी सोमवारी झालेल्या सुनावणी दरम्यान डीएसके यांना न्यायालयात हजर केले होते. त्यावेळी डीएसके यांनी न्यायालयाकडे बोलण्याबाबत संधी मागितली. यावेळी त्यांनी नेहमीप्रमाणेच हाती घेतलेले प्रकल्प पूर्ण करण्याचा दावा करुन दोन वर्षामध्ये ठेवीदारांचे पैसे परत करु शकेल, असे सांगितले.
२०१४ पासून २०१७ पर्यंत जी व्यक्ती प्रकल्प पूर्ण करू शकली नाही, ती व्यक्ती दोन वर्षात प्रकल्प कसे पूर्ण करणार, असा सवाल विशेष सरकारी वकील प्रवीण चव्हाण यांनी उपस्थित केला. तसेच डीएसके न्यायालयाची दिशाभूल करत असल्याचे सांगितले.
ठेवीदारांचे ५०१ कोटी रुपये सहज देता येऊ शकतात. म्हाडासोबत अनेक प्रोजेक्ट पूर्ण करण्यात आलेले आहेत, असे डीएसके यांनी न्यायालयाला सांगितले. त्याला अ‍ॅड. चव्हाण यांनी विरोध केला. आजच्या तारखेला ठेवीदारांचे १ हजार २८६ कोटी इतके देणे आहे. १ हजार ६५० कोटी रुपये बँकांचे देणे आहे. तर, १३५ कोटी रुपये एमसीडीचे देणे आहे. मग प्रकल्प पूर्ण करण्यासाठी डीएसके कोठून पैसे आणणार, असा प्रश्न अ‍ॅड. चव्हाण यांनी उपस्थित केला.