मुंबईत आयोजित पत्रकार परिषदेत आ. गोटे यांनी हे आरोप केले. आरोपांच्या पुष्ट्यर्थ त्यांनी काही व्यक्तीच्या फोनवरील संभाषणाच्या रेकॉर्डही ऐकून दाखवल्या. धुळे पालिका निवडणुकांचे निकाल गिरीश महाजन यांनी आधी जाहीर केल्याप्रमाणेच लागले. महाजन यांच्या मतदारसंघातील शेंदुर्णा येथे आजपर्यंत भाजपा कधीही विजयी होऊ शकला नाही. पण अचानकपणे तेथे नगराध्यक्षासह १४ उमेदवार विजयी झाले.
जामनेर या महाजनांच्या गावात नगरपरिषदेच्या निवडणुकीत २५ पैकी २५ जागा निवडून आल्या. या सर्व यशामागे ईव्हीएममधील हेराफेरी कारणीभूत आहे. त्यासाठी हैदराबाद येथील एका हॅकरची मदत घेण्यात आली. हॅकिंग करण्यासाठी मतदान होणाऱ्या ठिकाणी तसेच मतदान यंत्रे ठेवण्यात आलेल्या ठिकाणी जीओ आणि व्होडाफोनचे मोबाइल टॉवर युद्धपातळीवर उभारण्यात आले. महापालिकेची त्यासाठी कोणतीही परवानगी घेण्यात आली नाही. अधिकारीदेखील मॅनेज करण्यात आले. याबाबतचे सर्व पुरावे आपल्याकडे आहेत. मात्र, निवडणूक आयोग, पोलीस यांच्याकडे तक्रार करूनही आपल्याला दाद मिळालेली नाही, असेही अनिल गोटे म्हणाले.