Exit Poll 2021 : पश्चिम बंगालमध्ये पुन्हा ममतादिदीच तर तामिळनाडूत अण्णाद्रमुकला फटका; एक्झिट पोलचा अंदाज

नवी दिल्ली : पोलीसनामा ऑनलाइन – देशातील पाच राज्यांची निवडणूक प्रक्रिया गुरुवारी समाप्त झाली. एकीकडे कोरोनाचे संक्रमण वाढत असताना दुसरीकडे मात्र या पाच राज्यात निवडणुकीचा धुरळा उडत होता. दरम्यान, निवडणूक प्रक्रिया संपताच एक्झिट पोलचे निष्कर्ष हाती येऊ लागले आहेत. यामध्ये पश्चिम बंगालमध्ये पुन्हा ममता बॅनर्जीच सत्ता स्थापन करतील तर तामिळनाडूत अण्णाद्रमुकला जनरोषाचा फटका बसेल असा अंदाज सर्वेक्षण संस्थानी वर्तवला आहे. तर दुसरीकडे आसाम आणि केरळात अनुक्रमे भाजप व माकपप्रणीत एलडीएफ सत्ता राखण्यात यशस्वी ठरतील, असे भाकीत वर्तविण्यात आले आहे. याशिवाय सत्तेसाठी मात्र पुदुच्चेरीत रस्सीखेच होण्याची शक्यता आहे. येत्या २ मेला या विधानसभा निवडणुकांचा निकाल लागणार आहे.

संपूर्ण देशाचे लक्ष पश्चिम बंगालकडे आहे. याठिकाणी पंतप्रधान नरेंद्र मोदी आणि गृहमंत्री अमित शहा यांनी यांनी मोठ्या प्रमाणात सभा घेतल्या होत्या. तर ममता बॅनर्जीनीही आक्रमक प्रचार केला होता.प्रचारादरम्यान काही हिंसक घटनाही घडल्या होत्या. त्यामुळे पश्चिम बंगालमध्ये कोणाची सत्ता येणार याकडे सर्वांचे लक्ष आहे. एक्झिट पोल्सनी बंगालमध्ये पुन्हा ममतांच्या तृणमूलचीच सत्ता येईल, असे स्पष्ट संकेत दिले आहेत. मात्र, असे असले तरी भाजपही मुसंडी मारणार आहे. कारण निष्कर्षांमध्ये भाजप १०० पेक्षाही अधिक जागा मिळवेल असे सांगण्यात आले आहे.

पुदुच्चेरी विधानसभेच्या ३० जागांसाठी भाजपप्रणीत रालोआ आणि काँग्रेस यांच्यात जोरदार रस्सीखेच होण्याची शक्यता वर्तविण्यात आली आहे. तर सर्वच एक्झिट पोल्सनी तामिळनाडूतील सत्ताधारी अण्णाद्रमुक पक्षाला पायउतार व्हावे लागेल, असा अंदाज वर्तवला आहे. द्रमुकला येथे स्पष्ट बहुमत मिळून तो पक्ष सत्तेत येण्याची चिन्हे आहेत.

एनआरसी आणि सीएए या मुद्द्यांमुळे आसामची निवडणूक राष्ट्रीय चर्चेचा विषय ठरली होती. या ठिकाणी भाजपच पुन्हा सत्तेवर येईल, असे भाकीत एक्झिट पोल्सनी वर्तवले आहे.

मुख्यमंत्रिपदाचा उमेदवार ई. श्रीधरन यांना ठरवत भाजपने केरळात जोर मारण्याचा प्रयत्न केला असला तरी मल्याळी जनतेला ते रूचलेले नसल्याचे एक्झिट पोलवरून दिसते. त्यामुळे मुख्यमंत्री पिनरायी विजयन यांच्या नेतृत्वाखालील एलडीएफ या माकपप्रणीत डाव्या आघाडीलाच पुन्हा पसंती मिळेल, असा अंदाज आहे.

तामिळनाडू संस्था            डीएमके+         एआयडीएमके+           एएएमके
रिपब्लिक-सीएनएक्स       १६०-१७०           ५८-६८                    ४-६
टुडेज-चाणक्य                 १६४-१८६           ४६-६८                    ०
पी-मार्क                         १६५-१९०           ४०-६५                    १-३

केरळ संस्था                    एलडीएफ             यूडीएफ                  एनडीए
रिपब्लिक-सीएनएक्स       ७२-८०                ५८-६४                   १-५
इंडिया टुडे-एक्सिस          १०४-१२०            २०-३६                   ०-२
पोल डायरी                     ७७-८७                ५१-६१                   २-३
पी-मार्क                         ७२-७९                ६०-६६                    ०-३

प. बंगाल संस्था               तृणमूल               भाजप               डावी आघाडी
रिपब्लिक-सीएनएक्स       १२८-१३८         १३८-१४८               ११-२१
इंडिया टुडे-एक्सिस          १३०-१५६        १३४-१६०                ०-२०
एबीपी सी-व्होटर             १५२-१६४        १०९-१२१               १४-२५
टाइम्स नाऊ सी-व्होटर      १५८                ११५                      १९
जन की बात                   १०४-१२१        १६२-१८५               ३-९
ईटीजी रिसर्च                  १६४-१७६         १०५-११५             १०-१५
पी मार्क                         १५२-१७२         ११२-१३२             १०-२०
सीएनएन न्यूज                १८ १६२            ११५                      १५
टुडेज-चाणक्य                १८०                  १०८                      ४

पुदुच्चेरी संस्था               भाजप               काँग्रेस
रिपब्लिक-सीएनएक्स     १६-२०              ११-१३

आसाम संस्था               भाजप+              काँग्रेस+
रिपब्लिक-सीएनएक्स     ७४-८४             ४०-५०
इंडिया टुडे-एक्सिस        ७५-८५             ४०-५०
एबीपी सी-व्होटर           ५८-७१             ५३-६६
टुडेज-चाणक्य              ६१-७९              ४७-६५
पी-मार्क                      ६२-७०              ५६-६४