45 वर्षापेक्षा जास्त वय असलेल्यांना 1 मार्चपासून ‘कोरोना’ची लस मिळवण्यासाठी ‘हे’ काम करावं लागेल, जाणून घ्या

पोलीसनामा ऑनलाइन टीम –   ६० वर्षांपेक्षा जास्त वय किंवा अन्य आजाराने ग्रस्त असणाऱ्या४५ वर्षांपेक्षा जास्त वय असणाऱ्यांना 1 मार्चपासून कोरोना लस (Coronavirus Vaccine) मोफत दिली जाईल. तर खासगी केंद्रांवर लस घेतल्यास त्यांना शुल्क द्यावे लागेल. मात्र गंभीर आजाराने ग्रस्त ४५ वर्षांपेक्षा जास्त वयाच्या लोकांना यासाठी स्वाक्षरीकृत वैद्यकीय प्रमाणपत्र आवश्यक असेल, ज्यात त्यांच्या आजाराचे तपशील असतील. दरम्यान, सरकारने बुधवारी असा निर्णय घेतला. केंद्र सरकारने याआधी अशी माहिती दिली होती की, लसीकरणासाठी नोंदणी करण्यासाठी कोव्हिन अ‍ॅपचा वापर केला जाईल आणि त्याअंतर्गतच त्यांना जवळच्या लसीकरण केंद्राची माहिती दिली जाईल. मात्र सध्या हे app केवळ आरोग्य कर्मचारी आणि फ्रंटलाइन वर्कर्सच वापरू शकत आहेत.

सूत्रांच्या माहितीनुसार, जे लोकं यापैकी कोणत्याही श्रेणीमध्ये येत असतील तर त्यांना त्यांच्या मेडिकल कंडिशनबाबत एक फॉर्म भरावा लागेल आणि त्यावर त्यांच्या डॉक्टरांची सही देखील घ्यावी लागेल. व्हॅक्सिनेशन सेंटरवर लस घेताना त्यांना हा फॉर्म आणावा लागेल. दरम्यान खाजगी लसीकरण केंद्रावर कोव्हिड व्हॅक्सिनच्या एका डोसची किंमत ३०० रुपयांपर्यंत असू शकते. तर केंद्रीय मंत्री प्रकाश जावडेकर यांनी दिलेल्या माहितीनुसार सरकारी व्हॅक्सिनेशन सेंटर्सवर ही लस मोफत दिली जाईल.

येत्या दोन दिवसांत एक यादी जाहीर करण्यात येणार आहे. त्यात कोणत्या आजारांना गंभीर प्रकारात समाविष्ट केले जाईल याची माहिती देण्यात येणार असल्याचे सूत्रांनी सांगितले. यात मधुमेह, कर्करोग, गंभीर दमा आणि मानसिक आजार त्याचप्रमाणे शिकण्यास असक्षम असलेल्या लोकांव्यतिरिक्त तीव्र हृदय रोग, फुफ्फुस, मूत्रपिंड आणि यकृत यांचा आजार असणाऱ्यांचा समावेश असू शकतो. यामध्ये इम्युनोसप्रेसन्ट्स, स्थूलपणा असलेले रूग्ण आणि अस्थिमज्जा किंवा स्टेम सेल ट्रान्सप्लांट केलेल्या रुग्णांचा देखील समावेश असू शकतो.