याबाबत माहिती देत ओंकार खाडिलकर म्हणाले, ‘अनादि मी अनंत मी’ या नाटकाचे आई-बाबांनी १९९० पर्यंत दीडशे प्रयोग केले. सावरकर यांच्या पन्नासाव्या आत्मार्पणदिनी, २६ फेब्रुवारी २०१६ रोजी मी नाटय़ाभिवाचन केले. ते पाहून बाबांनी मला विचारले ‘तू हे नाटक का करत नाहीस’, यानंतर आई-बाबांनी स्थापन केलेल्या ‘उत्तुंग सांस्कृतिक परिवार ट्रस्ट’मार्फत मी या नाटकाची निर्मिती केली.यामध्ये बाबाराव सावरकर यांची पत्नी येसूवहिनी ही भूमिका वेदश्री करत आहे. तर प्राजक्ता ही माई सावरकर यांची भूमिका साकारत आहे.या नाटकात प्राजक्ता ‘जयोस्तुते’ या गीतावर कथक नृत्याविष्कार साकारत आहे .
तसेच या नाटकाबाबत अधिक माहित देत ओंकार खाडिलकर यांनी सांगितले, ‘अनादि मी अनंत मी’ या नाटकाची संहिता आधुनिक माध्यमात जतन व्हावी या उद्देशातून हे नाटक ध्वनिनाटय़ स्वरूपात आणण्याचे आम्ही ठरविले आहे. नवी पिढी सध्या ऑडिओ बुक आणि वेब सिरीजचा अधिक प्रमाणात वापर करते . त्यामुळे या नाटकाचे ऑडिओ स्वरूपातील ध्वनिमुद्रण करण्यात येत आहे . तसेच हे नाटक चार-पाच भागात ऑडिओ अ‍ॅपद्वारे जतन करण्यात येणार आहे. आणि तसेच प्रेक्षकांना यू-टय़ूबवरही हे नाटक पाहता येईल.