अलवर (शहर) विधानसभा मतदारसंघातून आपल्याला भाजपाकडून उमेदवारी मिळेल, अशी आशा अलवर जिल्ह्यातील भाजपाचे नेते श्रीकृष्ण गुप्ता यांना होती. मात्र गेल्या आठवड्यात भाजपाकडून जाहीर झालेल्या उमेदवारांच्या यादीत त्यांचं नाव नव्हतं. भाजपानं या मतदारसंघातून संजय शर्मा यांना तिकीट दिलं. सध्या बनवारीलाल या मतदारसंघाचं प्रतिनिधीत्व करतात. तेदेखील भाजपाचे नेते आहेत. मात्र पक्षानं त्यांचाही पत्ता कापला. नव्या चेहऱ्यांना मैदानात उतरवून सरकारविरोधातील नाराजी टाळण्याचा भाजपाचा प्रयत्न आहे. अलवर जिल्ह्यातील भाजपाचे नेते श्रीकृष्ण गुप्ता यांनी काल उमेदवारी अर्ज भरला.
‘ब्राह्मण समाजाचे मतदार कमी असतानाही त्यांना उमेदवारी देण्यात आली. मात्र वैश्य समाजाचे मतदार जास्त असतानाही त्यांना तिकीट वाटपात जाणीवपूर्वक डावलण्यात आलं,’ असा आरोप गुप्ता यांनी केला. तिकीट वाटप करताना पक्षानं स्वत:चा आणि एजन्सीचा सर्व्हेदेखील विचारात घेतला नाही. त्यामुळे आपण पक्षाला रामराम करत असल्याचं गुप्ता यांनी एका वृत्तसंस्थेला सांगितलं. एवढंच नाही तर तिकीट वाटप करताना भाजपानं वैश्य समाजाकडे दुर्लक्ष केल्याची भावना गुप्ता यांनी पक्ष सोडताना बोलून दाखवली.