सिएटल : वृत्तसंस्था – केंद्र सरकारने मंजूर केलेल्या सुधारीत नागरिकत्व कायदा आणि राष्ट्रीय नागरिकता नोंदणीच्या विरोधात सिएटल सिटी कौन्सिलने ठराव मंजूर केला आहे. भारत सरकारने मंजूर केलेला कायदा भेदभाव निर्माण करणारा असल्याचे या ठरावात म्हटले आहे. सिएटल सिटी कौन्सिल ही अमेरिकेतील महत्त्वाची महापालिका समजली जाते.
भारतीय वंशाच्या सदस्या क्षमा सावंत यांनी हा ठराव मांडला. भारतीय संसदेने हा सीएए कायदा रद्द करावा व भारतीय संविधानाचे पालन करावे असे ठरावात म्हटले आहे. सीएएची अंमलबजावणी आणि एनआरसी प्रक्रिया रद्द करून संयुक्त राष्ट्र संघाच्या निर्वासितांबाबतच्या विविध करारांचे पालन करण्याचे आवाहन या ठरावाद्वारे करण्यात आले आहे. सिएटल सिटी कौन्सिलने योग्य भुमिका घेतल्याची नोंद इतिहासात घेतली जाईल, असे इक्वालिटी लॅब संस्थेचे तेहन्मोझी सुंदरराजन यांनी म्हटले आहे. या संस्थेसह इतर संस्थांनी देखील सीएए विरोधात आंदोलन छेडले आहे.
सीएए कायद्याविरोधातील ठराव हा धर्मिक स्वातंत्र्याला विरोध करणाऱ्यांना संदेश असल्याचे इंडियन अमेरिकन मुस्लिम कौन्सिलचे अध्यक्ष एहसान खान यांनी सांगितले आहे. द्वेष, कट्टरवादाला आंतरराष्ट्रीय समुदायाकडून स्वीकार्हता स्वीकार्हता मिळेल अशी अपक्षा करणेही चुकीचे असल्याचे त्यांनी म्हटले.