सोलापूर : पोलीसनामा ऑनलाईन – राष्ट्रवादी काँग्रेसच्या सोलापूरचे जिल्हाध्यक्ष दीपक साळुंखे यांनी महिला पदाधिकाऱ्याला अत्यंत अश्लील भाषेत शिवीगाळ केली आहे. त्यांच्या संभाषणाचा ऑडिओ सोशल मीडियावर व्हायरल झाला आहे. सोलापूर जिल्ह्यातील राष्ट्रवादीच्या पदाधिकारी निवडीतील असंतोष एका अक्कलकोटच्या कार्यकर्त्याने जिल्ह्याध्यक्ष दीपक साळुंखे यांना फोनवरून सांगण्याचा प्रयत्न केला. कोणासोबतही बोलताना आपण काय बोलतो याचे भान बाळगायला साळुंखे विसरले. कार्यकर्त्याशी बोलताना त्यांचा राग अनावर झाला आणि त्यांनी अत्यंत अश्लील आणि अर्वाच्य भाषेत राष्ट्रवादीच्या पदाधिकाऱ्यांचा उद्धार केला.
यावेळी फोन करणाऱ्या पदाधिकाऱ्याने साळुंखेंना समजावण्याचा प्रयत्न सुरु ठेवत असताना साळुंखे यांची गाडी राष्ट्रवादीचे जेष्ठ नेते मोहिते पाटील यांच्यावर घसरली तसेच एका महिला पदाधिकाऱ्याविषयी त्यांनी शिवराळ भाषा वापरली. राष्ट्रवादी काँग्रेसचे अध्यक्ष शरद पवार आपल्यासोबत आहेत तोपर्यंत राज्यात आपले कुणीही $%*& करू शकत नसल्याची मस्तवाल भाषा साळुंखे यांनी वापरली. आता पदाधिकारीच महिलांचा अशा प्रकारे शिवीगाळ करीत अपमान करीत असतील तर सर्वसामान्य माणसाने करायचे काय असा सवाल केला जात आहे.
दरम्यान, दीपक साळुंखे हे सोलापूर विधानपरिषदेचे माजी आमदार असून अजित पवार यांच्या अतिप्रेमातील नेते म्हणून दबदबा असल्याने त्यांना राष्ट्रवादीचे पद मिळाले आहे. नुकतेच जिल्ह्यातील पदाधिकाऱ्यांच्या बदलात अनेक ठिकाणी असंतोष दिसून आला. अक्कलकोटच्या एका पदाधिकाऱ्याने साळुंखे यांना यासंदर्भातच फोन केला होता. सध्या साळुंखे यांनी माढा लोकसभेसाठी आपला दावा जाहीर केला आहे. क्लिप व्हायरल झाल्यावर साळुंखे यांनी हा आपला आवाज नसल्याचा कांगावा सुरु केला असून कोर्टात जाण्याची भाषा सुरु केली आहे.
असा आहे फोनवरील संवाद
कार्यकर्ता – हॅलो आबासाहेब, मला — या महिला पदाधिकाऱ्याचा सारखा फोन येऊ लागलाय.. पक्षाच्या निवडीचं काय झालं असं विचारत आहेत.. चुकीच्या निवडी झाल्या तर आम्ही राजीनामा देणार आहे..
दीपक आबा – आबा असल्या भुरट्या कार्यकर्त्यांना घाबरत नाही.. असली भीती घालू नका कुठल्या माकडाची आणि बाईची मला भीती घालू नका … कोणाला द्यायचं असेल राजीनामा तर द्या … मोहिते पाटलाचे चमचे आहेत …. वागविणारा .. पक्षांची पावती… फाडली नाही.. त्या ‘बाई’ला * आला असेल तर दे म्हणावं राजीनामा, * . “शरद पवार आहेत तो पर्यत माझं जिल्ह्यातच काय राज्यात सुद्धा कोणी … वाकडं करू शकत नाहीत. मोहिते पाटलांचे चमचे, ** लोकांनी आपल्याला पक्ष निष्ठा शिकवू नये”…
अशा प्रकारचे बेताल आणि शिवराळ संभाषण या ऑडिओ क्लिपमध्ये आहे. त्यामुळे पक्षाच्या महिला आणि इतर पदाधिकाऱ्यांबाबत अश्लील भाषा वापरणाऱ्या साळुंखेंवर पक्षांचे ज्येष्ठ नेते काय कारवाई करतात, की त्यांना पाठीशी घालतात याकडे सोलापूर जिल्ह्यातील राष्ट्रवादीच्या कार्यकर्त्यांचं लक्ष लागलं आहे.
जाहिरात
