INX Media Case : चिदंबरम आणि त्याचा मुलगा कार्ती यांच्याविरूद्ध ईडीने दाखल केले आरोपपत्र
file photoनवी दिल्ली : वृत्तसंस्था – अंमलबजावणी संचालनालय ईडीने कॉंग्रेस नेते पी. चिदंबरम आणि त्यांचा मुलगा कार्ती यांच्यावर आयएनएक्स मीडिया मनी लॉन्ड्रिंग प्रकरणात दोषारोपपत्र दाखल केले आहे. चिदंबरम आणि त्याचा मुलगा कार्ती यांच्याविरोधात केंद्रीय एजन्सीने विशेष न्यायाधीश अजय कुमार यांच्या दिल्ली येथील विशेष न्यायालयात पासवर्ड प्रोटेक्‍टेड ई-चार्जशीट दाखल केली. या खटल्याची सुनावणी घेत असलेल्या न्यायाधीशांनी कोर्टाचे कामकाज सामान्य झाल्यावर एजन्सीला आरोपपत्रांची हार्डकॉपी सादर करण्याचे आदेश दिले.
आरोपपत्रात चिदंबरम यांच्या व्यतिरिक्त कार्तीचे चार्टर्ड अकाऊंटंट एस.एस. भास्करमरमण आणि इतरांचीही नावे आहेत. दरम्यान, आयएनएक्स मीडिया भ्रष्टाचाराच्या प्रकरणात सीबीआयने गेल्या वर्षी 21 ऑगस्ट रोजी माजी अर्थमंत्री पी. चिदंबरम यांना अटक केली होती. नंतर, गेल्या वर्षी 16 ऑक्टोबरला मनी लॉन्ड्रिंग प्रकरणात ईडीनेही अटक केली होती. त्याच्या सहा दिवसांनंतर, 22 ऑक्टोबर रोजी सर्वोच्च न्यायालयाने सीबीआयद्वारे दाखल केलेल्या खटल्यात कॉंग्रेस नेते चिदंबरम यांना जामीन मंजूर केला. माजी अर्थमंत्री यांनी स्वत: च्या फायद्यासाठी पदाचा गैरवापर केल्याचे सांगत सीबीआयने गेल्या वर्षी चिदंबरम यांच्या जामिनाविरूद्ध निषेध नोंदविला होता. मात्र, गेल्या वर्षी चार डिसेंबर रोजी ईडीने दाखल केलेल्या खटल्यात कॉंग्रेस नेते चिदंबरम यांना जामीन मंजूर झाला. 2007 मध्ये तत्कालीन केंद्रीय अर्थमंत्री चिदंबरम यांनी आयएनएक्स मीडियाला 305 कोटी रुपयांची विदेशी गुंतवणूक मिळवून देण्यासाठी परकीय गुंतवणूक प्रोत्साहन मंडळाला (एफआयपीबी) मंजूर करण्याच्या नियमांचे पालन केले नसल्याचा आरोप आहे. सीबीआयने 15 मे 2017 रोजी याप्रकरणी गुन्हा दाखल केला.
दरम्यान, 17 जानेवारी रोजी सर्वोच्च न्यायालयाने माजी अर्थमंत्री पी. चिदंबरम यांचे पुत्र कार्ती चिदंबरम यांच्या याचिकेवर त्यांना 20 कोटी रुपये परत करण्याची परवानगी दिली होती. कार्ती यांनी परदेशात जाण्याची परवानगी मिळण्याची अट म्हणून 20 कोटी रुपये कोर्ट रजिस्ट्रीमध्ये जमा केले होते आणि त्या बदल्यात त्याला परदेशात जाण्याची परवानगी देण्यात आली. यापूर्वी सर्वोच्च न्यायालयाने जानेवारी 2019 च्या महिन्यासाठी 10 कोटी आणि मे महिन्यासाठी 10 कोटी रुपये जमा केले होते. पैसे जमा केल्यानंतर त्याला परदेशात जाण्याची परवानगी होती.