नवी दिल्ली : वृत्तसंस्था – 50 अब्ज डॉलर्सहून अधिक औषधनिर्माण उद्योग देशाच्या जीवनासोबत जगही बनवत आहे. कोरोना काळाच्या सुरूवातीपासूनच, देशातील औषध उद्योग स्वस्त औषधांमुळे राष्ट्रीय आणि आंतरराष्ट्रीय पातळीवर लोकांचे जीवन वाचवत आहे. त्याचबरोबर, मागील वर्षाच्या मेच्या तुलनेत या वर्षाच्या मेमध्ये निर्यातीत 17 टक्क्यांनी वाढ करुन देशासाठी परकीय चलन मिळवित आहे. गेल्या वर्षीच्या याच कालावधीच्या तुलनेत मे महिन्यात एकूण निर्यातीत 36.47 टक्क्यांनी घसरण झाली आहे. अ‍ॅडव्हान्स टॅक्सच्या बाबतीत फार्मास्युटिकल उद्योगाने राष्ट्रीय स्तरावर अव्वल स्थान गाठले. कर विभागाच्या सूत्रांनी दिलेल्या माहितीनुसार चालू आर्थिक वर्षाच्या पहिल्या तिमाहीत फार्मा हे अव्वल क्षेत्र होते तर रिअल इस्टेट, स्टील आणि सिमेंट या क्षेत्रांमध्ये मागे आहे.
फार्मास्युटिकल उद्योगात प्रत्यक्ष व अप्रत्यक्षरित्या 25 लाख लोक करतायेत काम
फार्मास्युटिकल उद्योग सध्या 70-80 टक्के क्षमतेने कार्यरत आहेत तर इतर क्षेत्रातील उद्योग जास्तीत जास्त 40-50 टक्के क्षमतेने कार्यरत आहेत. औषध उद्योगात प्रत्यक्ष व अप्रत्यक्षरित्या 25 लाख लोक काम करतात. व्यवसाय वाढल्यामुळे या क्षेत्रात बेरोजगारी झाली नाही.
जूनच्या निर्यातीतही उत्कृष्ट कामगिरीची अपेक्षा
फार्मा एक्सपोर्ट प्रमोशन कौन्सिलचे अध्यक्ष दिनेश दुआ म्हणाले की, जूनमध्येही फार्माची निर्यात चांगली राहील. हायड्रॉक्सीक्लोरोक्विन (एचसीक्यू) निर्यात करण्यास परवानगी मिळाल्यास केवळ एचसीक्यूच निर्यातीत 300-400 कोटी रुपयांची वाढ होईल. ते म्हणाले की, गेल्या आर्थिक वर्षात 2019-20 मध्ये फार्मा क्षेत्राने 20.6 अब्ज डॉलर्सची निर्यात केली. चालू आर्थिक वर्षात निर्यातीत 23 अब्ज डॉलर्सचा अंदाज आहे. चालू आर्थिक वर्ष 2020-21 च्या पहिल्या दोन महिन्यांत (एप्रिल ते मे) फार्मा निर्यातीत मागील आर्थिक वर्षातील याच कालावधीच्या तुलनेत 9.21 टक्क्यांनी वाढ झाली आहे. चालू आर्थिक वर्षाच्या पहिल्या दोन महिन्यांत वस्तूंच्या निर्यातीत 47.5 टक्क्यांनी घट झाली आहे. फार्मा क्षेत्रात गेल्या पाच वर्षांत 20 टक्क्यांहून अधिक दराने वाढ होत आहे.
भारत अमेरिकेला 40 टक्के जेनेरिक फार्माची निर्यात करतो
भारत आपले 40 टक्के जेनेरिक फार्मा अमेरिकेला तर ब्रिटनला 25 टक्के निर्यात करतो. दरम्यान, औषध निर्मितीसाठी आवश्यक 90 टक्के सक्रिय औषधी घटक (एपीआय) किंवा कच्च्या मालासाठी भारत चीनवर अवलंबून आहे. दुआ म्हणतात की, भारत केवळ तीन फार्मा उत्पादने तयार करण्यासाठी चीनकडून 8000 कोटी रुपयांचे आयात करतो. ते म्हणाले की, 2002 पर्यंत भारताने चीनकडून एपीआय आयात करत नव्हते, परंतु 2005 पर्यंत स्वस्त एपीआय चीनमधून येऊ लागले आणि भारतीय एपीआयचे उत्पादन बंद झाले.