मुंबई : पोलीसनामा ऑनलाईन – मुंबईत नेहमीच मराठीसाठी आग्रही असणाऱ्या महाराष्ट्र नवनिर्माण सेनेने मुंबईतील शेअर मार्केटच नाव बदलण्याची मागणी केली आहे. आशिया खंडातील सर्वात जुने असलेल्या बॉम्बे स्टॉक एक्सचेंज मार्केटचे (Bombay Stock Exchange ) नाव बदलून मुंबई स्टॉक एक्सचेंज ( Mumbai Stock Exchange) करावे अशी मागणी मनसेचे नेते बाळा नांदगावकर (MNS leader Bala Nandgaonkar) यांनी आपल्या ट्विटर अकाऊंटवरून केली आहे. दरम्यान, मुंबई शहराचे नावही यापूर्वी बॉम्बे असेच होते. मात्र, मराठी जनांच्या भावना लक्षात घेऊन हे नाव बॉम्बेऐवजी मुंबई करण्यात आले आहे.
आशिया खंडातील सर्वात पहिले आणि सर्वात मोठी आर्थिक उलाढाल असणारे हे मार्केट आहे. 9 जुलै 1875 म्हणजेच तब्बल 145 वर्षांपूर्वी मुंबईत बॉम्बे स्टॉक एक्सचेंजची स्थापना झाली. देशातील कार्पोरेट क्षेत्राला वृद्धी प्राप्त करुन देण्यात आणि आर्थिक विकास साधण्याच हे मोठ मार्केट आहे. विशेषत: BSE या नावाने हे शेअर मार्केट ओळखले जाते. मात्र, मनसेने आता या नावाला आक्षेप घेतला असून बॉम्बेऐवजी मुंबई स्टॉक एक्सचेंज असे नामकरण करण्याची मागणी केली आहे.
बॉम्बे स्टॉक एक्सचेंज हे आशियाचे सर्वात जुने स्टॉक मार्केट असून त्याचे बॉम्बे नाव बदलून मुंबई स्टॉक एक्सचेंज करावे. हा स्टॉक एक्सचेंज महाराष्ट्र आणि भारताचा अभिमान आहे. याचे नाव मुंबई स्टॉक एक्सचेंजच असले पाहिजे, असे ट्वीट बाळा नांदगावकर यांनी केले आहे.