पालघर : पोलीसनामा ऑनलाईन – पालघर तालुक्यातील धुकटन-बहाडोली फाट्यावर दुचाकी अपघातात एका दोन महिन्याच्या चिमुकल्याचा दुर्दैवी मृत्यू झाला. हा अपघात पालघर तालुक्यातील धुकटन-बहाडोली फाट्यावर झाला. यामध्ये जखमी झालेल्या आई आणि मृत मुलाच्या भावाला खासगी रुग्णालयात उपचारासाठी दाखल करण्यात आले आहे.
विक्रमगड येथील रहिवाशी असलेले रणजीत पागी हे शनिवार (दि.२६) संध्याकाळी आपल्या कुटुंबासह दुचाकीवरून पालघरच्या दिशेने येत होते. पालघर-मनोर रस्त्यावर धुकटन -बहाडोली फाट्याजवळ त्यांच्या दुचाकीसमोर अचानक कुत्रा आल्याने त्यांनी त्वरित ब्रेक लावला. मात्र त्यामुळे २ महिन्यांच्या बाळाला घेऊन बसलेली त्यांची पत्नी आशा व दुसरा २ वर्षीय मुलगा राजवीर रस्त्यावर फेकले गेले. त्याचवेळी पाठीमागून येणाऱ्या एका कारने या तिघांनाही चिरडले.
या अपघातात २ महिन्याच्या आरुषचा जागीच मृत्यू झाला असून दोन वर्षीय राजवीर व त्याची आई गंभीर जखमी झाले आहेत. त्यांना पालघर येथील खासगी रुग्णालयात उपचारासाठी दाखल करण्यात आलं. मात्र राजवीरची प्रकृती जास्त खालावल्याने त्याला पुढील उपचारासाठी सिल्वासा येथील रुग्णालयात हलविण्यात आले आहे.