औरंगाबाद : पोलीसनामा ऑनलाइन – एका कोरोनाबाधित रुग्णाने मला घरी जाऊ द्या, या मागणीसाठी रुग्णालयातच तुफान राडा घालत तोडफोड केली. औरंगाबाद येथील घाटी रुग्णालयात (aurangabad government hospital) रविवारी (दि. 6) ही घटना घडली आहे.
औरंगाबाद शहरामध्ये कोरोनाची परिस्थिती आता आटोक्यात आली असली तरी दररोज कोरोनाबाधित रुग्णांची संख्या वाढतच आहे. त्यामुळे शहरातील शासकीय रुग्णालय घाटीमध्ये कोरोनाबाधित रुग्णांसाठी विशेष विभाग तयार केला आहे. परंतु, रविवारी रात्री एका रुग्णाने घरी जाण्यासाठी रुग्णालयामध्ये तुफान राडा घातला. या रुग्णाने दुपारपासून आपल्या घरी जाऊ द्यावे, यासाठी डॉक्टरांकडे मागणी केली होती. पण, उपचार पूर्ण झाल्याशिवाय डिस्चार्ज देण्यास डॉक्टरांनी नकार दिला होता. पण, तरीही या रुग्णाने घरी जाण्याचा तगादा लावून धरला होता. संध्याकाळी पुन्हा या रुग्णाने वैद्यकीय कर्मचाऱ्यांना घरी सोडण्याची विनंती केली असता त्यांनीही नकार दिला. त्यामुळे संतापलेल्या या रुग्णाने रुग्णालयात तोडफोड करायला सुरुवात केली. कोरोना वाॅर्डात त्याने जोरदार राडा घातला आणि घरी जाण्यासाठी पळू लागला.
पण, डॉक्टर आणि सुरक्षारक्षकांनी कोरोना वाॅर्डाचे दार बाहेरून बंद करून घेतले. पण, तरीही हा रुग्ण ऐकायचे नाव घेत नव्हता. मुख्य दाराला लावलेल्या काचाही फोडून टाकल्या. धक्कादायक म्हणजे कोरोनाबाधित असल्यामुळे या रुग्णाला पकडण्यासाठी कुणी पुढे येण्यास धजावत नव्हते. अखेर सुरक्षारक्षक आणि पोलिसांनी घटनास्थळी धाव घेऊन या कोरोनाबाधित रुग्णाला समज दिली. या घटनेमुळे काही काळ रुग्णालयात तणावाचे वातावरण पसरले होते.