नवी दिल्ली, वृत्तसंस्था : अमेरिकेच्या एका मोठ्या औषध कंपनीचे मुख्य कार्यकारी अधिकारी म्हणाले की, जे कुणी या वर्षाच्या समाप्तीपूर्वी कोरोना लस मिळवण्याविषयी बोलत आहेत, ते जनतेचे मोठे नुकसान करीत आहेत. हार्वर्ड बिझिनेस रिव्ह्यूमध्ये प्रसिद्ध झालेल्या अहवालानुसार मर्क अँड कोज (Merck & Co’s) चे मुख्य कार्यकारी अधिकारी केनेथ फ्रेझियर म्हणाले की ज्या कोरोना लसींची चाचणी सुरु आहे त्या यशस्वी होण्याची कोणतीही हमी नाही.
केनेथ फ्रेझियर म्हणाले की, ज्या लसींवर काम सुरु आहे, होऊ शकते की तयार झाल्यावर त्यांची गुणवत्ता पर्याप्त नसेल. ते म्हणाले की जर तुम्ही कोट्यावधी लोकांना लस देणार असाल तर लस कशी कार्य करते हे तुम्हाला माहित असले पाहिजे. यापूर्वी एका अमेरिकन अधिकाऱ्याने असे म्हटले होते की सरकार या वर्षाच्या अखेरपर्यंत लसींचे उत्पादन करण्यासाठी विविध कंपन्यांशी भागीदारी करीत आहे. ट्रम्प सरकार 2021 च्या अखेरपर्यंत 30 कोटी लसींच्या डोसच्या उत्पादनावर विचार करीत आहे. त्याला ऑपरेशन वार्प स्पीड प्रोग्राम असे नाव देण्यात आले आहे.
मर्कचे मुख्य कार्यकारी अधिकारी केनेथ फ्रेझियर म्हणाले की यापूर्वीच्या बर्याच लसी केवळ संरक्षण देण्यातच अपयशी ठरल्या नाहीत तर विषाणूला सेलवर हल्ला करण्यास मदत केली. हे यामुळे घडले कारण या लसी इम्यून करण्याच्या गुणधर्मांमध्ये पूर्णपणे सुसज्ज नव्हत्या. म्हणून आपल्याला सावधगिरी बाळगण्याची गरज आहे.
मे महिन्यात ऑस्ट्रियाची कंपनी थेमिस बायोसायन्स समवेत मर्क कंपनीने संभाव्य लस कँडिडेटवर अभ्यास करण्याची योजना आखली होती. परंतु कंपनीने अद्याप या लसीची क्लिनिकल चाचणी सुरू केलेली नाही. कोरोना साथीबद्दल केनेथ फ्रेझियर म्हणाले की कृष्णवर्णीय लोकांच्या उच्च मृत्यु दरामुळे पुन्हा एकदा वंशभेदाची समस्या उघडकीस आली आहे. आतापर्यंत जगात कोरोना प्रकरणांची संख्या 1.34 कोटींपेक्षा जास्त झाली आहे. तर 5.81 लाख लोकांचा मृत्यू झाला आहे.