मुंबई : पोलीसनामा ऑनलाईन
सुप्रिया थाेरात
मेगाभरती होणार ….. ह्या घोषणेमुळे सरकारी नोकरीच्या जाहिरातींकडे डोळे लावून बसलेल्या विद्यार्थ्यांच्या आणि तरुणांच्या मनात आशा पल्लवित झाल्या होत्या. कारण सरकारी नोकरीसाठी अनेक दिवस अभ्यास करणाऱ्या विद्यार्थ्यांसाठी ही दिलासा देणारी बातमी होती.
नोकरी नाही म्हणून आलेले नैराश्य, बेरोजगारी, आर्थिक विवंचना, रखडलेली लग्ने यातून अनेक तरुणांना मेगाभरती हा आशेचा किरण वाटला होता. तब्बल आठ वर्षांनंतर राज्य सरकारने नोकरभरतीची घोषणा केली होती. मेगाभरतीनुसार राज्यात ७२,००० पदे भरली जाणार होती. ज्यात यंदा ३६००० आणि पुढच्या वर्षी ३६००० पदे भरण्यात येतील असं सांगण्यात आलं होत. पण मेगाभरती स्थगित करण्यात आली हे जाहीर करण्यात आलं त्यामुळं आता मेगाभरतीवर कधी होणार यावर विद्यार्थ्यांमध्ये संभ्रम निर्माण झाला आहे.
मराठा आरक्षणाची कायदेशीर प्रक्रिया नोव्हेंबर महिन्यापर्यंत पूर्ण करणार असून, तोपर्यंत सरकारी मेगाभरतीला स्थगिती देण्यात आल्याची घोषणा मुख्यमंत्री देवेंद्र फडणवीस यांनी ५ ऑगस्ट रोजी दूरदर्शनच्या सह्याद्री वाहिनी व आकाशवाणीद्वारे राज्यातील जनतेशी संवाद साधताना केली. आणि ही भरती पुढे ढकलण्यात आली. मुख्यमंत्र्यानी सांगितल्यानुसार, हा मुद्दा मागासवर्गीय आयोगकडे पाठविण्यात आला आहे. आयोगाचा निकाल नोव्हेंबर अखेर पर्यंत येऊ शकतो. तूर्तास मेगाभरती रद्द झाली किंवा पुढे किती कालावधीसाठी पुढे ढकलली यावर अंदाज लावता येणं अवघड आहे. कदाचित १० ते २० डिसेंबरच्या दरम्यान किंवा जानेवारीमध्ये मेगाभरतीची जाहिरात येण्याची शक्यता आहे. पण याबद्दल अद्यापही कोणतीही ठोस माहिती किंवा निर्णय नाही.