स्वस्त धान्याच्या तस्करांकडून पत्रकारास बेदम मारहाण
एक तास पोलिस ठाण्यात फिर्यादीस बसवून ठेवले
मारहाणीत जितेंद्र कोंडीराम पितळे (रा. लोणी व्यंकनाथ, ता. श्रीगोंदा, जि. नगर) हे जखमी झाले आहेत. ते एका साप्ताहिकाचे संपादक आहेत. याबाबत समजलेली माहिती अशी की, श्रीगोंदा शहरातील पेडगाव रस्त्यावरील शासकीय गोदामातून सार्वजनिक वितरणासाठी असलेल्या धान्याची तस्करी केली जात असल्याचे पितळे यांच्या लक्षात आले. म्हणून गुरुवारी रात्री नऊ वाजता ते सदर टेम्पोचा पाठलाग करू लागले. पेडगाव रस्त्यावरील नक्षत्र लॉन येथे पितळे यांना रमेश झंजाडे, टेम्पोचा (क्र एमएच 16 एई 1195) चालक, मालक व इतर तीन अनोळखी व्यक्तींनी रात्री साडेनऊ वाजता त्यांना लाकडी दांडके, बूट व लाथाबुक्क्यांनी बेदम मारहाण केली. या मारहाणीत पितळे यांना दुखापत झाली. कसातरी बचाव करून अंधाराचा फायदा घेऊन ते पळाले. त्यांनी तात्काळ श्रीगोंदा पोलीस ठाणे गाठले. पोलिसांना घडलेला प्रकार सांगितला. परंतु श्रीगोंदा पोलिसांनी पोलीस निरीक्षक आल्याशिवाय तुमची फिर्याद घेता येणार नाही, असे सांगितले. त्यानंतर एक तास पोलिस ठाण्यात बसवून ठेवले. पोलीस निरीक्षक दौलत जाधव यांनी फिर्यादी पत्रकार जितेंद्र यांची चौकशी केली. त्यानंतर ठाणे अंमलदारास अदखलपात्र गुन्ह्याची नोंद करण्यास सांगितले.