प्रवीण कुमार असं या लग्न पत्रिकेवर मोदींचा फोटो छापणाऱ्या तरुणाचे नाव असल्याचे समोर आले आहे. सदर तरुण हा पेशाने एसी मेकॅनिक असून, तो कुवेत येथे कामाला आहे. मुख्य म्हणजे तो कर्नाटकमधील मंगळुरूजवळील उल्लाल येथील राहणारा आहे. सदर तरुण प्रवीण कुमार याने आपल्या विवाहाची पत्रिकाच मोदीमय बनवली असल्याचं दिसत आहे. इतकेच नाही तर महत्त्वाचे म्हणजे या पत्रिकेवर त्याने मोदींच्या छायाचित्राबरोबरच नरेंद्र मोदींच्या नेतृत्वाखालील सरकारने राबवलेल्या विविध योजनांची माहितीही दिली आहे.
प्रवीण कुमार या तरुणाचा विवाह डिसेंबर महिन्यात होणार आहे अशी माहिती समोर आली आहे. आश्चर्याची बाब म्हणजे या तरुणाने विवाहाल उपस्थिती लावणाऱ्या मंडळींना विशेष संदेश दिला आहे. वऱ्हाडी मंडळींनी अहेर आणि भेटवस्तू आणण्याऐवजी पुढच्या निवडणुकीत मोदींना मत देण्याचे आवाहन त्याने या संदेशातून केले आहे. याविषयी माहिती देताना प्रवीण कुमार म्हणाला, ”नरेंद्र मोदींनी देशाला परदेशामध्ये ओळख मिळवून दिली आहे. ते आमच्यासाठी स्वाभिमानाचा विषय आहे. म्हणूनच मी माझ्या विवाह पत्रिकेवर जे काही लिहिले आहे ते मनापासून लिहिले आहे,”असे प्रवीणने सांगितले.