खळबळजनक ! कास्टिंग डायरेक्टर चालवत असलेल्या ‘सेक्स रॅकेट’ चा पर्दाफाश, पुण्यात शिकणाऱ्या 3 मुलींची सुटका

On Jan 21, 2020

File Photo

मुंबई : पोलीसनामा ऑनलाईन – फिल्मी दुनियेची तरूणाईला भूरळ पडली असून याचाच फायदा काही लोक घेत असल्याचे समोर आले आहे. मुंबईत चित्रपटात किंवा एखाद्या मालिकेत काम मिळेल या उद्देशाने आलेल्या तरुणींकडून वेश्या व्यवसाय करून घेतला जात असल्याचे धक्कादायक प्रकार उघडकीस येत आहेत. सोमवारी केलेल्या कारवाईमध्ये एका कास्टिंग दिग्दर्शकासह त्याच्या साथीदाराला समाजसेवा शाखेच्या पथकाने अटक करून तीन मॉडेल व परदेशी मुलींची सुटका केली. महिन्याभरातील ही चौथी घटना असून यामुळे खळबळ उडाली आहे.

नावेद शरीफ अहमद अख्तर (वय-26) आणि नावीद सादीक सय्यद (वय-22) असे अटक करण्यात आलेल्या आरोपींची नावे असून त्यांची महिला साथीदार आणि वेश्या दलाल फरार झाली आहे. ही टोळी चित्रपटात आणि मालिकेत काम देण्याच्या बहाण्याने मॉडेल आणि तरूणींकडून वेश्या व्यवसाय करवून घेत होती. तसेच या मोबदल्यात ते 40 हजार रूपये घेत असल्याचे समोर आले आहे. नावीद सादीक सय्यद हा कास्टिंग डायरेक्टर असून त्याचे आणि त्याचा साथीदार नावेद अख्तर याचे बॉलिवुडशी संबंध असल्याचे तपासात उघड झाले आहे.

आरोपी मॉडेल आणि परदेशी मुलींकडून वेश्या व्यवसाय करून घेत असल्याची तसेच त्यासाठी 40 हजार रुपये घेत असल्याची माहिती गुन्हे शाखेला मिळाली होती. त्यानुसार गुन्हे शाखेने सोमवारी (दि.20) अंधेरी पूर्व येथील इम्पिरियल पॅलेस हॉटेलमध्ये छापा टाकून तीन मुलींची सुटका केली. पोलिसांनी आरोपी वेश्यादलाल नावेद याच्याशी संपर्क साधून डमी ग्राहक पाठवून ही कारवाई केली.

पुण्यातील महाविद्यालयात शिक्षण –
सुटका करण्यात आलेल्या मुली या तुर्कमेनिस्तान या देशातील असून त्या विद्यार्थिनी आहेत. शिक्षणासाठी त्या शैक्षणीक विसावर भारतात आल्या आहेत. सद्या त्या पुणे येथील महाविद्यालयात कला शाखेत शिक्षण घेत आहेत. या मुली मुंबई येथे शुटींग करीता गेल्या होत्या. त्यावेळी त्यांची ओळख आरोपीसोबत झाली.

बॉलीवूडमधील कामासाठी तडजोड –
आरोपीने बॉलीवुडमध्ये काम पाहिजे असल्यास तडजोड करावी लागेल. तसेच सद्या एका ब्रँडच्या जाहीरातीचे शुट असून त्याकरीता परदेशी मुलींची आवश्यकता असल्याचे सांगून त्यांना शरिरीक संबंध ठेवावे लागतील असे आरोपीने मुलींना सांगितले.

पोलिसांनी केलेल्या कारवाईमध्ये सुटका केलेल्या मुलीकडे चौकशी केली असता आरोपी वेश्या दलाल यांने वर्सोवा येथील फ्लॅटवर दोन मुलींना ठेवून घेतले असून त्यांच्याकडून वेश्या व्यवसाय करवून घेत असल्याची माहिती पोलिसांना मिळाली. त्यानुसार वर्सोवा येथील फ्लॅटवर छापा टाकून त्या ठिकाणी असलेल्या दोन मुलींची सुटका करण्यात आली.

महिन्याभरातील चौथी कारवाई –
3 जानेवारी रोजी जुहू परिसरातील झेड लक्झरी रेसीडेन्सी या तारांकित हॉटेलमध्ये छापा टाकून उझबेकिस्तानच्या दोन मुलींची सुटका करण्यात आली. यामध्ये बॉलीवुड मधील कास्टिंग डायरेक्टर राजेशकुमार कलमेश्वर लाल याला अटक करण्यात आली.

14 जानेवारी रोजी वर्सोवा अंधेरी येथील कॅफे कॉफी डे, जे.पी. रोड 7 बंगला येथे कारवाई करण्यात आली. या कारवाईत दोन मुलींची सुटका करण्यात आली. या मुलींनी हिंदी चित्रपटात ज्युनिअर आर्टीस्ट म्हणून व बॉलीवुडमध्ये मेकअप आर्टीस्ट म्हणून काम केले आहे. या प्रकरणात बॉलीवू़डमध्ये कास्टिंग डायरेक्टर म्हणून काम करणाऱ्या नविनकुमार प्रेमलाल आर्या (वय-32) याला अटक करण्यात आली आहे.

तसेच 16 जानेवारी रोजी अंधेरी येथील ड्रॅगनफ्लाय हॉटेल या थ्री स्टार हॉटेलमध्ये केलेल्या कारवाईत तीन मुलींची सुटका करण्यात आली. यामध्ये एका अल्पवयीन मुलीचा समावेश असून तिने वेब सिरीजमध्ये काम केले आहे. तर दुसऱ्या मुलीने एका मराठी टीव्ही मालिकेत लहान भूमिका केली होती. तर तिसऱ्या मुलीने सावधान इंडिया या मालिकेत काम केल्याचे चौकशीत समोर आले आहे. या कारवाईत वेश्यादलालास अटक करण्यात आली आहे.

ही कारवाई सह पोलीस आयुक्त (गुन्हे) संतोष रस्तोगी, पोलीस उपायुक्त अंमलबजावणी राजेंद्र दाभाडे, साहाय्यक पोलीस आयुक्त विनोद शिंदे यांच्या मार्गदर्शनाखाली अनैतिक मानवी वाहतुक प्रतिबंध कक्ष, समाजसेवा शाखेचे प्रभारी पोलीस निरीक्षक संदेश रेवले, पोलीस शिपाई सचिन चांदगावकर, भुषण रामोळे, सचिन पाटसुपे, रुपेश मोरे, महेश पवार, महिला पोलीस शिपाई दर्शना तावडे यांच्या पथकाने केली.

फेसबुक पेज लाईक करा –