पिंपरी : पोलीसनामा ऑनलाइन – व्हॉट्सअ‍ॅप वरती स्टेटस ठेवून इंजिनीअर तरुणाने इमारतीवरून उडी मारून आत्महत्या केल्याची धक्कादायक घटना स्पाइन रोड मोशी नजीक असलेल्या एका बड्या गृहसंकुलात बुधवारी (८ जुलै) घडली. अक्षय अनिल पोतदार (२५, सध्या रा. संभाजीनगर, मुळगाव- वाई, सातारा) असे आत्महत्या केलेल्या अभियंत्याचे नाव आहे. पोलिसांनी दिलेल्या माहितीनुसार, अक्षय हा चिखली येथील एका कंपनीत काम करीत होता. धक्कादायक बाब म्हणजे अक्षय याने आई, वडील, बहिणीला सांभाळा असे व्हॉट्सअ‍ॅप स्टेटस ठेवून तो राहत नसलेल्या इमारतीच्या अकराव्या मजल्यावरून आत्महत्या केली आहे.
अक्षय याने स्पाइन रोड मोशी येथील फूड्स व्हीले सोसायटीतील फेज क्रमांक तीनमध्ये असलेल्या ए बिल्डिंगवरील अकराव्या मजल्यावरून बुधवारी दुपारी साडे तीनच्या सुमारास उडी घेऊन आत्महत्या केली. अक्षय हा या सोसायटीत आला तेव्हा त्याला सुरक्षारक्षकांनी थांबविले होते. तेव्हा अक्षय याने टेरेसची किल्ली मागितली असता सुरक्षारक्षकांनी त्याला किल्ली दिली नव्हती. त्यानंतर काही वेळाने गृहसंकुलात काम असल्याचे सांगत, त्याने तशी रजिस्टरला नोंद केली. पंधरा-वीस मिनिटांनी अक्षय हा इमारतीच्या अकराव्या मजल्यावर गेला. तेथे पाठीवरील सॅक आणि मोबाइल ठेवून तेथून अक्षय याने खाली उडी मारून आत्महत्या केली. अक्षय याच्या आत्महत्येचे कारण रात्री उशिरापर्यंत समजू शकले नव्हते. तपास एमआयडीसी भोसरी पोलीस करीत आहेत.