शस्त्रास्त्र कायदा, खंडणी आणि इतर गंभीर गुन्ह्यांमध्ये अटक करण्यात आलेल्या २७ वर्षांच्या पवनकुमार सिंग या आरोपीला चांगल्या वर्तवणुकीच्या आधारे पोलीस अधिकाऱ्यांनी गांधी जयंतीच्या दिवशी मुक्त केले होते. मात्र पवनकुमार सिंग याने तुरुंगाबाहेर पडल्यानंतर दोन जणांचा खून केला. याच हत्येप्रकरणी पुन्हा पोलिसांना त्याला अटक केली असून आता पोलिसांवरच चौकशीची टांगती तलवार आहे.
प्राथमिक चौकशीनंतर या प्रकरणामध्ये पवनची सुटका करताना स्थानिक पोलीस अधिकाऱ्यांनी नियमांचे उल्लंघन केल्याची माहिती समोर आले आहे. चांगल्या वागणुकीसाठी एखाद्या कैद्याची नियोजित काळाच्या शिक्षेअधी सुटका करताना त्या कैद्याने केलेला गुन्हा, त्याचे वय, त्याची तुरुंगातील वागणूक, तो किती काळ तुरुंगात आहे या सर्व गोष्टींचा विचार केला जातो. तसेच कोर्टात खटला सुरु असणाऱ्या आरोपीची या नियमांअंतर्गत सुटका करता येत नाही. असे असतानाही पवनची सुटका करण्यात आल्याने आता पोलिसांवरच कारवाई होण्याची शक्यता व्यक्त केली जात आहे.