जळगाव : पोलीसनामा ऑनलाईन – जळगाव जिल्ह्यातील गरजू क्षयरोग रुग्णांना दरमहा लागणाऱ्या सकस आहार, सक्षम प्रवाह उपक्रमाला निर्मिती फाउंडेशनने हातभार लावला आहे. फाउंडेशनचे अध्यक्ष नितीन सपके यांनी वाढदिवस साजरा न करता जागतिक क्षयरोग निवारण दिनाचे औचित्य साधून प्रोटिन्स डबे वितरीत केले.
जिल्हा क्षयरोग निवारण विभाग आणि एकता रिटेल किराणा मर्चंटस पतसंस्थेतर्फे जिल्हा क्षयरोग मुक्त करण्यासाठी सकस आहार, सक्षम प्रवाह उपक्रम हाती घेतला आहे. उपक्रमात गरजू रुग्णांना दरमहा सकस आहार पुरविण्यात येतो. निर्मिती फाउंडेशनचे अध्यक्ष नितीन सपके यांनी वाढदिवस साजरा न करता क्षयरोग रुग्णांना साहाय्य करण्यासाठी पुढाकार घेतला. जागतिक क्षयरोग दिनी एकता पतसंस्थेचे अध्यक्ष ललित बरडीया, जिल्हा क्षयरोग अधिकारी डॉ.जयवंत मोरे यांच्याकडे नितीन सपके यांनी प्रोटिन्सचे डब्बे स्वाधीन केले. यावेळी नितीन सपके यांनी सांगितले की, समाजसेवेतून समाधान मिळते आणि समाधानातून आत्मिक शांती मिळते. दरवर्षी वाढदिवसाच्या होणाऱ्या खर्चाला फाटा देत सामाजिक उपक्रमांना निर्मिती फाउंडेशनतर्फे प्राधान्य देण्यात येईल, तसेच जिल्हा क्षयरोग मुक्त करण्यासाठी इतरांनादेखील प्रोत्साहित करण्यात येईल, असे त्यांनी सांगितले.
कार्यक्रमासाठी निर्मिती फाउंडेशनचे यादवराव बऱ्हाटे, बाळासाहेब सुर्वे, रमेश चौधरी, उमेश गवळी, मिलींद चौधरी, धनराज चौधरी, अनिल गवळी, मनोज चौधरी, सागर सोनवणे, बाळू पाटील, सचिन भोळे, अनुप पाटील, महेश माळी, गौरव चौधरी, अमोल सोले, वैभव धर्माधिकारी, विनय जोशी आदिंसह फाउंडेशनचे सहकारी व मित्र परिवार उपस्थित होता. वर्षभरात कमीत कमी १०० क्षयरोग रुग्ण दत्तक घेत त्यांना मदत करण्याचा मानस फाउंडेशनच्या पदाधिकारी व सदस्यांनी व्यक्त केला. सूत्रसंचालन संजय बाविस्कर यांनी केले.