धुळे : पोलीसनामा ऑनलाइन – लळींग (ता. धुळे) येथील धबधब्यात तीन तरुण बुडाल्याची धक्कादायक घटना आज घडली आहे. लळींग किल्ल्याच्या पायथ्याशी असलेल्या लळींग कुरण धबधब्याजवळ ही दुर्घटना घडली आहे. बुडालेल्या तीन तरुणांपैकी दोन जण धुळे शहरातील असून, एक तरुण अमळनेर तालुक्यातील असल्याची माहिती मिळत आहे.
धुळे शहरातील काही तरुण आपल्या मित्रांसोबत लळींग कुराणातील धबधब्याजवळ पर्यटनासाठी गेले होते. त्याचवेळी धबधब्याच्या पायथ्याशी उतारावर पाय घसरून पडल्याने ही दुर्घटना घडल्याचे सांगितलं जात आहे. दरम्यान, घटनेची माहिती मिळताच पोलीस उपअधीक्षक सचिन हिरे, मोहाडी पोलीस ठाण्याचे सहायक पोलीस निरीक्षक संगीता राऊत पोलीस पथकासह घटनस्थळी दाखल झाले. तसेच SDRF च्या जवानांना पाचारण करण्यात आलं असून, आतापर्यंत दोन जणांचे मृतदेह शोधण्यात SDRF च्या जवानांना यश आलं आहे. तर एका तरुणाचा मृतदेह शोधण्याचे कार्य सुरु आहे.
लळींग येथील धबधब्यात पावसाळ्यात पोहण्यासाठी अनेक तरुण जात असतात. याआधी देखील पोहण्यासाठी गेलेल्या तरुणांचा बुडून मृत्यू झाल्याच्या घटना घडल्या आहेत. त्यामुळे येथे सुरक्षेची व्यवस्था करण्याची वेळोवेळी मागणी होते. मात्र, दुर्घटना घडल्यानंतर अशा उपाययोजनांचा प्रश्न थंड बस्त्यात जातो.